Hlutu 3. sætið í Siljunni

Þeir Jóhannes Ísfjörð, Óskar Óðinn og Steinar Bragi, nemendur í 10. bekk Oddeyrarskóla tóku þátt í Siljunni. Strákarnir hömpuðu 3. sætinu fyrir myndband sem þeir gerðu um bókina Elmar fer í göngutúr. Umsögnin sem þeir fengu fyrir myndbandið var: Mjög sniðugt, frumlega leyst og vel teiknað. Skemmtileg notkun á teikningum í anda bókarinnar.

Siljan er myndbandasamkeppni Barnabókaseturs Íslands fyrir grunnskólanemendur. Markmið keppninnar er að auka áhuga barna og unglinga á bóklestri. Keppt er í tveimur flokkum, 5. – 7. bekk og 8. – 10. bekk. Siljan er opin nemendum í öllum skólum landsins og er keppnin er styrkt af Mennta- og menningarmálaráðuneytinu. 

Við óskum þeim Óskari, Jóhannesi og Steinari Braga innilega til hamingju með flottan árangur!

Hér má sjá mynband strákanna:

Frábær námstækifæri með Erasmus+

Nú á vormánuðum hafa 10 kennarar úr Oddeyrarskóla farið í námsferðir / skólaheimsóknir sem fjármagnaðar hafa verið með tveggja ára Erasmus styrk sem sótt var um á vordögum 2017.

Sjö kennarar af yngsta stigi skólans fóru til Noregs og heimsóttu skóla í nágrenni við Osló þar sem þeir kynntu sér hugmyndafræði í stærðfræðikennslu sem við erum að þróa í skólanum undir leiðsögn Þóru Rósu Geirsdóttur ráðgjafa hjá MSHA. Í daglegu tali köllum við þessa stærðfræði Zankov – stærðfræðina, en upphaflega kemur hugmyndafræðin frá Rússlandi og byggir á hugmyndafræði Zankov. Þessi hugmyndafræði í kennslu hefur verið að ryðja sér til rúms í skólum víðs vegar um Noreg (undir heitinu utviklende matematikk) og eru þrír skólar að vinna að þróun kennsluhátta í þessa veru á Íslandi og er árangur rannsakaður samhliða því. Við erum nú að ljúka öðru ári í innleiðingunni, en kennslan byggir mikið á samræðum og vinnu með skilning nemenda á stærðfræðihugtökum.

Þrír af þeim kennurum sem starfa í heilsueflingarnefnd skólans brugðu sér til Glasgow í Skotlandi heimsóttu Dr. John Paul Fitzpatrick kennsluráðgjafa, sem styður m.a. við skóla sem eru að innleiða hugmyndafræði hugarfars vaxtar eða Growth mindset. Kennararnir heimsóttu tvo skóla sem John Paul hefur verið að styðja við og var margt gagnlegt skoðað og rætt í þeirri ferð. Heilsueflingarnefnd skólans hefur verið að kynna sér þessa hugmyndafræði í vetur í tengslum við geðræktarþátt heilsueflandi grunnskóla og er ætlunin að unnið sé með hugarfar vaxtar að einhverju marki í öllum bekkjum skólans til að auka vilja og þrautseigju nemenda til náms og trú þeirra á eigin getu. Foreldrar hafa flestir fengið kynningu á hugmyndafræðinni, enda er orðræða foreldra og starfsfólks skóla mikilvæg þegar kemur að því að vinna með hugarfar nemenda gagnvart getu og vilja til náms. Við að fara í skólaheimsóknir lærist að auki margt annað sem kennarar geta nýtt sér og búa að í starfinu sínu.

Við erum afar þakklát Rannís og Erasmus+ fyrir að fá tækifæri sem þessi til starfsþróunar, því við vitum að þetta eflir okkur sem fagmenn og gerir skólastarfið okkar enn betra.  

Oddeyrarskóli hampaði 2. sætinu annað árið í röð!

Í dag fór Skólahreystikeppnin fram í Íþróttahöllinni á Akureyri. Oddeyrarskóli keppti í Akureyrarriðlinum, en í þeim riðli voru sjö skólar. Í liðinu eru þau Helgi Þór Ívarsson, Gunnborg Petra Jóhannsdóttir, Ólafur Helgi Erlendsson og Tinna Huld Sigurðardóttir. Varamenn liðsins voru þau Oliwia Moranska og Óskar Óðinn Sigtryggsson.

Lið Oddeyrarskóla hafði undirbúið sig vel og hampaði 2. sætinu. Við óskum liðinu okkar og þjálfaranum þeirra, Birgittu Maggý íþróttakennara, innilega til hamingju með frábæran árangur! Lið Brekkuskóla bar sigur úr býtum og óskum við þeim innilega til hamingju.

Skólahreystiliðið okkar

Er einhver í þínum skóla sem á skilið að fá Viðurkenningu fræðsluráðs!

Frá árinu 2010 hefur fræðsluráð veitt þeim sem skarað hafa fram úr í skólastarfi viðurkenningar við hátíðlega athöfn. Viðurkenningarnar eru í tveimur flokkum, þ.e. nemendur og skólar/starfsfólk.

Markmiðið er að vekja sérstaka athygli á því sem vel er gert og hvetja þá sem fyrir valinu verða til þess að halda áfram því góða starfi sem þeir eru að vinna og jafnvel gera enn betur.

Tilnefna má nýbreytniverkefni um hvaðeina í skólastarfi sem unnið hefur verið að á yfirstandandi skólaári, nemendavinnu, vinnu hópa eða einstaklinga, upplýsingamiðlun (s.s. heimasíður og fréttabréf), stefnumótun og skipulag, starf eins kennara eða samvinnu þeirra, verkefni í almennri kennslu, sérgreinum eða sérkennslu, framlag starfsfólks skólans, forvarnarstarf, félagsstarf, foreldrasamstarf o.s.frv.

Allir sem þekkja til skólasamfélagsins geta tilnefnt. Tilnefningar þurfa að berast fyrir lok föstudagsins 12. apríl nk.

Til að tilnefna, þá ferð þú á eftirfarandi slóð: https://www.akureyri.is/is/thjonusta/menntun/vidurkenning-skolanefndar en þar er einnig að finna frekari upplýsingar um viðburðinn.

You need to add a widget, row, or prebuilt layout before you’ll see anything here. 🙂

Skemmtilegir smiðjudagar að baki

Smiðjudagar voru hér í Oddeyrarskóla í dag og í gær. Að þessu sinni var ákveðið að dagarnir einkenndust af áherslum skólans, þ.e. upplýsingatækni, heilsueflingu, læsi og geðrækt.

Nemendum var skipt í hópa sem voru blandaðir af hverju stigi fyrir sig og fóru á þessum tveimur dögum á milli níu 40 mínútna stöðva. Á stöðvunum voru nemendur að forrita, gera vísindatilraunir, taka þátt í ýmiss konar samskiptaleikjum, læra um jákvæðar hugsanir, teikna myndir við ljóð, búa til kappakstursbíla í tæknilegó, skapa tónlist í tölvum, gera núvitundaræfingar o.fl.

Við erum gríðarlega ánægð eftir þessa daga, nemendur voru glaðir og duglegir og það gleður okkur öll!

You need to add a widget, row, or prebuilt layout before you’ll see anything here. 🙂

Smiðjuhópur í fjöruferð

Þessi flotti hópur úr 1. og 2. bekk fóru með smiðjukennaranum sínum, henni Freydísi, í gönguferð niður í fjöru. Á vegi þeirra varð töluvert magn af rusli. Að sjálfsögðu lögðu þau sitt af mörkum til að fegra bæinn okkar og fjöruna með því að tína það upp sem á vegi þeirra varð.

Öskudagsball

ÖMánudaginn 4. mars halda nemendur í 10. bekk öskudagsball í Oddeyrarskóla.

Böllin eru liður í fjáröflun fyrir skólaferðalag.

Allir nemendur eru velkomnir í sínum búningum.

Ball fyrir 1. – 4.  bekk verður 17:00 – 18:30

Ball fyrir 5. – 7. bekk verður 19:00 – 20:30

Það kostar 500 kr. inn á ballið og það verður sjoppa á staðnum.

Nemendur í 10. bekk

Nýr salatbar tekinn í notkun

Í dögunum tókum við í notkun nýjan salatbar í Oddeyrarskóla. Þetta er mikið fagnaðarefni þar sem möguleikar okkar aukast á að bjóða upp á fjölbreyttan og hollan mat fyrir nemendur og starfsfólk. Við erum afar ánægð með þessa nýjung. Á myndinni má sjá þær Ágústu og Mörtu starfsmenn eldhúss og tvo nemendur í 3. bekk.