Símkerfið liggur niðri

Uppfært: Símkerfi er komið í lag.

Vegna bilunar liggur símkerfi skólans niðri.  Við vitum ekki hversu langan tíma viðgerð tekur.  Ef þið eigið mjög brýnt þá sendið tölvupóst á netföngin kristinj@akmennt.is eða fkh@akmennt.is.

 

Útivistardagur í næstu viku

Samkvæmt skóladagatali er á dagskrá útivistardagur nk. þriðjudag 4. september. Eins og þið vitið reynum við að fara þegar veður er gott og reiknum við með að svo verði þennan dag. Ætlunin er að allir nemendur skólans gangi saman upp að Hraunsvatni og mun ferðin taka stóran hluta skóladagsins. Það er því mikilvægt að börnin verði vel búin og vel nestuð fyrir ferðina. Ekki er verra að hafa aukasokka með í för. 

Við sendum nánari upplýsingar eftir helgi.

Skólasetning í Oddeyrarskóla þriðjudaginn 21. ágúst 2018

Kæru foreldrar/forráðamenn og nemendur!

Þriðjudaginn 21. ágúst verður Oddeyrarskóli settur. Kristín skólastjóri setur skólann í íþróttasal skólans kl. 9:00 og eftir það fara allir nemendur í 2. – 10. bekk með umsjónarkennara sínum í stofur þar sem þeir fá afhentar stundatöflur og aðrar upplýsingar.

Nemendur og foreldrar 1. bekkjar eru boðaðir í viðtöl fyrstu skóladagana og því verður ekki sérstök móttaka á skólasetningardag fyrir hópinn hjá umsjónarkennara, en það væri gaman að sjá sem flesta 1. bekkjar nemendur á sal skólans kl. 9.

Við vekjum um leið athygli forráðamanna og annarra áhugasamra um skólann á nýuppfærðri heimasíðu þar sem m.a. má lesa vorskýrslu okkar frá síðasta ári, bekkjarnámskrár, skólanámskrá og starfsáætlun skólans fyrir skólaárið 2018-2019.

Valgreinanefnd grunnskólanna hlýtur viðurkenningu Fræðsluráðs

Í gær, fimmtudaginn 14. júní, fór fram afhending á viðurkenningum Fræðsluráðs Akureyrarbæjar. Meðal þeirra er hlutu viðurkenningu var valgreinanefnd grunnskólanna, en nefndin á veg og vanda að samvali grunnskólanna á Akureyri. Samvalið gerir nemendum bæjarins kleift að velja úr talsvert fleiri valgreinum en ef ekki um slíkt samstarf væri að ræða. Valgreinanefndin samanstendur af stjórnendum og námsráðgjafa, einum fulltrúa frá hverjum skóla. Fjóla Kristín Helgadóttir, deildarstjóri eldri deildar við Oddeyrarskóla, er fulltrúi skólans í nefndinni og hefur hún raunar setið í nefndinni frá stofnun hennar. Við óskum valgreinanefndinni innilega til hamingju með viðurkenningarnar og þökkum öllum fulltrúum hennar ötult starf í þágu unglinga á Akureyri.

Skólaslit á fimmtudag

Oddeyrarskóla verður slitið fimmtudaginn 7. maí 2018.

Skólaslit 1. – 7. bekkjar verða á sal kl. 13:00 og eru allir foreldrar velkomnir.

Skólaslit 8. -10. bekkjar og útskrift 10. bekkjar nema verður á sal kl. 17:00. Að þeirri athöfn lokinni er nemendum 10. bekkjar og fjölskyldum þeirra boðið í kaffi með starfsfólki skólans.

 

Oddeyrarskóli hlýtur styrk til Norðurlandasamstarfs um menntun án aðgreiningar

Hér er samstarfshópurinn í heimsókn í Mæla skólanum í Telemark í Noregi 2015.

Oddeyrarskóli, ásamt Háskólanum á Akureyri, hlaut á dögunum veglegan Nordplus styrk til þátttöku í tveggja ára Norðurlandasamstarfi þar sem skoðuð eru skólasamfélög sem hafa markvisst leitað leiða til að starfa í anda menntunar án aðgreiningar. Styrkurinn nemur tæpum 7 milljónum króna.

Markmið verkefnisins er að dýpka þekkingu okkar á því hvernig skólar og skólasamfélög geta styrkt færni sína til að mæta þörfum allra nemenda. Skoðaðir eru starfshættir í námi nemenda, kennslu og vinnubrögðum kennara sem og annarra sem að náminu koma. Hópurinn mun skoða hvað einkennir kennara, stjórnendur og skólamenningu þeirra skóla sem þykja ná góðum árangri í að mæta þörfum ólíkra nemenda. Reynt verður að skilja hvernig ólíkir þættir, svo sem menntun kennara og stjórnenda, stoðkerfið, starfsþróun og stjórnun (leadership) vinna saman við að styðja góða starfshætti í anda menntunar án aðgreiningar.

Skólasamfélög verða heimsótt í Tromsø í Noregi, í Gautaborg í Svíþjóð og á Akureyri á Íslandi til að gera athuganir og ræða við fólk úr skólasamfélaginu (foreldra, nemendur, kennara, stjórnendur, stoðþjónustu o.fl.) um hvernig skólasamfélagið vinnur saman að því að styðja við starfshætti skóla í þessum anda.

Í þessu samstarfi eru þrír fulltrúar frá hverju landanna þriggja. Fulltrúar Íslands í þessu verkefni eru Kristín Jóhannesdóttir, skólastjóri Oddeyrarskóla, Birna Svanbjörnsdóttir lektor við Háskólann á Akureyri og Jenný Gunnbjörnsdóttir, kennsluráðgjafi.

Unicef hlaupið á morgun

UNICEF – hreyfingin er verkefni sem við hér í Oddeyrarskóla höfum tekið þátt mörg síðastliðin ár, en þetta er hlaup þar sem nemendur safna áheitum og fer það eftir því hve nemendur hlaupa mikið hve mikið safnast.

Hlaupið fer fram á morgun og gefst nemendum tækifæri til að safna áheitum fyrir UNICEF. Yngri börnin fara 500 metra hring og þeir eldri hlaupa hring sem er 1.1 km.  Svo fer það eftir fjölda hringja sem nemendur hlaupa hve miklu þeir ná að safna.

Nánari upplýsingar er að finna hér í foreldrabréfi frá UNICEF – hreyfingunni.

Öflugri sjálfsmynd – erindi fyrir foreldra nemenda við Oddeyrarskóla

Oddeyrarskóli hefur fengið Kristínu Tómasdóttur til að flytja erindi sitt „Öflugri sjálfsmynd“ mánudagskvöldið 14. maí fyrir foreldra barna í skólanum og starfsfólk.

Í erindi sínu, sem er 1 klst, leggur Kristín áherslu á þrjá þætti, þ.e.

  1. Hvað merkir orðið sjálfsmynd?
  2. Hvernig þekkjum við sjálfsmynd barnanna okkar?
  3. Hvernig geta foreldrar haft áhrif á sjálfsmynd barnanna sinna?

Heimili og skóli geta í sameiningu hjálpað krökkunum með þessa þætti og getur verið gott að fá hvatningu og góð ráð til þess.

Því viljum við fá a.m.k. einn fulltrúa frá hverju heimili á þetta fræðsluerindi Kristínar sem verður í Oddeyrarskóla mánudagskvöldið næstkomandi, 14. maí,  kl. 20:00.

Hér skráið þið ykkur á erindið.

Fjölgreindadagur í skólanum á morgun!

Á morgun er svokallaður fjölgreindadagur í skólanum. Allir nemendur skólans vinna saman í litlum hópum að því að leysa ýmsar þrautir allan þennan dag. Börn frá 1. bekk og upp í 10. bekk vinna saman í hópum, t.d. að því að svara spurningum í tölvuleik, þekkja persónur úr bókum eða leysa hreyfiþrautir. Markmiðið er að vekja athygli á því að við höfum mismunandi hæfileika og að í sameiningu getum við leyst allar þrautir sem lagðar eru fyrir okkur.

Nesti má vera í frjálslegra lagi, sætabrauð og safar en ekkert sælgæti eða gos.

Við minnum á frídaginn á fimmtudag.

Tomorrow the children will work in groups, children from 1st to 10th grade work together in small groups. They will work toghether, solving all sorts of tasks both with mind and body. The aim is to draw attention to the fact that we all have different abilities and when working together we can solve everything.

The children are allowed to bring something different for snacks, like doughnuts and chocklate milk, but no candy or soda.

There is no school on Thursday.