Árshátíðargleði


Á morgun höldum við árshátíðarsýningar fyrir foreldra, aðra aðstandendur og gesti kl. 11, 13 og 15. Í dag fengu nemendur og starfsfólk skólans forskot á sæluna þegar lokaæfing var haldin. Atriðin eru að vanda vel æfð og skemmtilegt og því full ástæða til að hlakka til morgundagsins. Miðasala verður við innanginn fyrir þá sem ekki hafa keypt miða í forsölu og kostar miðinn 600 kr. Ágóðinn rennur í nemendasjóð skólans og nýtist í fjölbreyttu skólastarfi.

Einnig heldur foreldrafélagið sitt glæsilega kaffihlaðborð milli sýninga og það kostar 1000 kr. fyrir fullorðna og 500 kr. fyrir börn skólaaldri. Frítt fyrir börn yngri en 6 ára. Við hvetjum alla til að fá sér af kræsingunum og eiga glaðan dag með okkur og krökkunum. Um leið styrkjum við foreldrafélagið sem styður vel við bakið á skólanum.



Við lærum af mistökum

Oddeyrarskóli er að vinna með hugarfar vaxtar (Growth mindset). Stýrihópur um heilsueflandi grunnskóla leiðir verkefnið og hefur viðað að sér ýmsu lesefni. Ýmsar barna bækur hafa verið samdar til að auka skilning barna á viðfangsefninu. Ein þeirra er The girl who never made mistakes eftir Mark Pett og Gary Rubinstein. Þessi bók hefur ekki verið gefin út á íslensku en nemendur í 8. bekk tóku að sér að þýða bókina yfir á íslensku undir leiðsögn Rakelar enskukennara. Nú hafa þeirheimsótt nemendur í 1. – 4. bekk og lesið bókina fyrir þá. Eins og titillinn gefur til kynna fjallar bókin um það að gera mistök, að það geti allir gert mistök og að við megum ekki dæma okkur fyrir það. Frekar eigi að nýta mistökin til að læra af þeim. Í heimsókninni fengu nemendur veggspjald í stofuna sína sem á er letrað: Mistök eru sönnun þess að þú ert að læra.

You need to add a widget, row, or prebuilt layout before you’ll see anything here. 🙂

Skólastarf hefst á ný á morgun

Kæru nemendur og forráðamenn!

Við óskum ykkur öllum gleðilegs nýs árs og þökkum fyrir samstarf og samveru á liðnu ári.

Skólastarf hefst á ný í Oddeyrarskóla á morgun, fimmtudaginn 3. janúar 2019.

Hlökkum til að sjá ykkur!

Gleðileg jól!

Í dag voru litlu-jól nemenda haldin hátíðleg.

Við sungum jólalög og dönsuðum í kringum jólatré á sal skólans við undirleik Ívans Mendez. Óvæntir  gestir komu í heimsókn (með miklum látum reyndar), en það voru þeir Giljagaur og Stekkjarstaur.

Sjá má sýnishorn frá deginum á meðfylgjandi myndum.

Starfsfólk Oddeyrarskóla óskar nemendum og foreldrum gleðilegrar jólahátíðar og gleðilegs nýs árs. Við þökkum gott samstarf á árinu sem er að líða og hlökkum til endurfunda á nýju ári.

Jóla-fjölgreindardagur

Í dag, miðvikudaginn 12. desember, héldum við jólafjölgreindardag. Nemendur voru í aldursblönduðum hópum allt frá 1. – 10. bekk og fóru á milli stöðva þar sem þau unnu ýmis jólatengd verkefni. Hver hópur fór á fimm stöðvar. Á einni stöðinni skáru nemendur út laufabrauð sem þeir gátu snætt með hátíðarmatnum sem boðið er uppá í mötuneytinu. Á öðrum stöðvum voru leikir og föndur og virtust allir una sér vel.

 

Hér eru nokkrar myndir frá deginum.

Fréttir frá nemendum úr valgreininni fjármálalæsi

Í valgreininni fjármálalæsi í Oddeyrarskóla höfum við í haust unnið nokkur skemmtileg verkefni.

Fyrsta verkefnið sem við unnum var að skoða verð á Glerártorgi. Allir nemendur völdu sér eina dýra vöru, t.d. tölvu og sjónvarp. Við reiknuðum svo út hvað það kostaði að kaupa vöruna með því að taka lán fyrir vörunni t.d. með Netgíró og Pei. Niðurstaðan var sú að kostnaður við að kaupa vöruna með afborgunum var allt frá 13% – 25%. Við reiknuðum einnig hversu miklu munaði að kaupa vörur í litlum eða stórum umbúðum. Í öllum tilfellum var hagstæðara að kaupa meira magn, t.d. kostaði ½ líter af mjólk 130 kr. og 1 líter 212 kr. Þannig munaði 48 krónur á sama magni.

Hópurinn fór á tvær bílasölur og valdi sér álitlegan bíl til að ,,kaupa”. Nemendur reiknuðu út hvað það kostar að taka bílalán og hve mikil útborgun ætti að vera. Allir settu upp ársyfirlit sem sýndi hvað kostaði að eiga og reka bílinn í heilt ár. Flestum kom að óvart hvað það var dýrt að reka bílinn. Ekki var nóg að geta staðið við útborgun eða afborganir. Nemendur flettu upp á kostnaði, t.d. við umfelgun, smurningu, tryggingar, viðhald, dekk, bifreiðargjöld o.s.frv.  

Eitt af verkefnum vetrarins var að búa til áætlun til að safna peningum og settu nemendur sér markmið og upphæð til að leggja fyrir mánaðarlega. Þannig var verkefnið sett upp í töflureikni og nemendur fundu ársvexti og reiknuðu hvað færi há upphæð í fjármagnstekjuskatt.

Við erum einnig að fylgjast með verðþróun á ákveðnum vörum í matvöruverslun og berum saman verð í ágúst og desember. Niðurstöður af þeirri könnun benda ekki til verðhækkana. Nemendur hafa líka fylgst með verði á bensíni og olíu við höfum notað handhæga síðu á netinu sem heitir gsmbensin.is. Þannig höfum við séð að einn lítri af bensíni hefur hækkað um nokkrar krónur, líklega vegna þess að gengi íslenskrar krónu hefur lækkað gagnvart öðrum gjaldmiðlum.

Í flestum verkefnum studdist hópurinn við bókina Fyrstu skrefin í fjármálum eftir Gunnar Baldvinsson sem skólinn fékk að gjöf. Með bókunum fylgdu spil með hugtökum sem tengjast fjármálum og fjármálalæsi sem við höfum notað mikið. Í lokin settum við helstu hugtök upp í Quizlet sem var góð tilbreyting.    

Nemendur í fjármálalæsi í Oddeyrarskóla og María Aðalsteinsdóttir, kennari

Dagskrá á sal í dag

Í dag hittumst við, nemendur og starfsfólk skólans,
á sal til að minnast 100 ára fullveldisafmælis okkar Íslendinga. Eftir að hafa hlýtt á stutta uporifjun um fullveldið hjá Kristínu skólastjóra og fallegan upplestur Ellenar Óskar á ljóðinu Hver á sér fegra föðurland sungu nemendur Ísland er land þitt og Ferðalok við undirspil Ívars Helgasonar. Við notuðum jafnframt tækifærið til að ræða falleg samskipti og góða framkomu við náungann í tilefni af baráttumánuði gegn einelti. Við þetta tilefni fengu nemendur 1. bekkjar og nýir nemendur í 2. og 3. bekk húfur sem á stendur: GEGN EINELTI. Við vonum að nemendur verði duglegir að nota þessar fallegu húfur sem starfsmenn skólans hafa prjónað í öllum regnbogans litum. Engar tvær húfur eru eins sem minnir okkur á að engir tveir einstaklingar eru eins og að við eigum að virða ólíka einstaklinga.

Peningagjöf til bókakaupa frá Lionshreyfingunni


Í dag boðaði Lionshreyfingin skólastjórnendur og skólasafnskennara á svæðinu til fundar þar sem afhentar voru peningafjárhæðir til bókakaupa í skólana. Fjárhæðir miðuðust við fjölda nemenda í skólunum. Oddeyrarskóli fékk 80 þúsund krónur og munu þær koma sér afar vel til að bæta nýjum barna- og unglingabókum í bókakost fallegu Lestu-hillunnar okkar. Kristín skólastjóri og Þórarinn skólasafnskennari tóku á móti gjöfinni og munu þau í framhaldinu heimsækja bekki og kalla eftir óskum nemenda varðandi bókakaup. Við þökkum Lionshreyfingunni innilega fyrir veglega og kærkomna gjöf!