Reglur um hjólanotkun í Oddeyrarskóla

hjólareglur

Munum að nota hjálma á hjólum!

1. Nemendur mega koma á hjóli í skólann frá og með vorönn í 2. bekk.

2. Nemandi sem kemur á hjóli í skólann gerir það á ábyrgð foreldra/forráðamanna sem skulu meta færni og getu nemandans sem og aðstæður til að hjóla í skólann.

3. Algjört skilyrði er að nota viðeigandi öryggisbúnað.

4. Ekki má nota reiðhjól í frímínútum eða meðan á skólastarfi og frístundargæslu stendur. Við brot á þessari reglu má skólinn kyrrsetja hjól og skal foreldri/forráðamaður þá sækja hjólið.

5. Þegar komið er á hjóli í skólann á að geyma hjól læst á skólalóðinni í eða við hjólagrindur. Skólinn ber enga ábyrgð á hjólum. Þjófnað eða skemmdarverk getur viðkomandi kært til lögreglu.

Endurmenntunardagar kennara

Kennarar á tækninámskeiði

Kennarar á tækninámskeiði

Þessa dagana eru kennarar í endumenntun. Þeir hafa m.a. sótt námskeið í byrjendalæsi, Numicon, ritun, tæknimálum og um nemendur með sérþarfir. Starfsdagar kennara hefjast síðan á föstudag og við hlökkum til að taka á móti nemendum okkar fimmtudaginn 21. ágúst.

Skólasetning haustið 2014

Nú styttist í að nýtt skólaár hefjist hér í Oddeyrarskóla.

Stjórnendur eru komnir til starfa til að undirbúa skólaárið og er foreldrum því velkomið að hafa samband við skólann ef einhverjar spurningar eru. Skólinn verður settur fimmtudaginn 21. ágúst. Fyrst er stutt samvera á sal skólans og síðan fara nemendur í kennslustofur sínar og hitta umsjónarkennara.

Tímasetningar:

9:00 – 1. – 4. bekkur

10:00 – 5. – 10. bekkur

 

Námsgögn fyrir skólaárið 2014-2015

skóladótHér á heimasíðunni má finna innkaupalista fyrir nemendur í 5. – 10. bekk en að vanda býðst nemendum 1. – 4. bekkjar að vera með í sameiginlegum innkaupum á námsgögnum sem deildarstjóri heldur utan um. Í þessu felast innkaup á stílabókum, möppum, gámum o.þ.h. Foreldrar borga efnisgjald sem gildir fyrir allan veturinn.

Nemendur í 1. – 4. bekk þurfa því eingöngu að hafa liti í töskunni sinni og aðgang að ritföngum heima. Þetta fyrirkomulag hefur reynst okkur mjög vel, þar sem kennarar passa þá sjálfir að nýjar stílabækur séu til þegar á þarf að halda. Ef afgangur hefur orðið af efniskaupagjaldi hafa kennarar notað hann til að kaupa einhver gögn fyrir bekkinn, t.d. sameiginleg spil eða annað. Upphæðin er 3.500 kr. og má leggja inn á reikning og setja nafn barns sem skýringu. Kennitalan er 450908-2580 og banka- og reikningsnúmer 0302-13-110242.

Ef einhverjir vilja ekki vera með í þessu kerfi, heldur kaupa inn sjálfir, fá þeir nákvæmari innkaupalista hjá kennurum í haust. 

Vorskýrsla Oddeyrarskóla

Nú er Vorskýrsla Oddeyrarskóla komin á vefinn, en hún er vistuð undir flipanum starfshættir. Þessi skýrsla er yfirgripsmikil og ætti að gefa góða mynd af skólastarfinu í Oddeyrarskóla og er einnig leitast við að leggja mat á það. Út frá matinu hafa stjórnendur unnið að umbótaáætlun sem kynnt verður starfsfólki í ágúst 2014.

Hlaupið til styrktar UNICEF

UnicefÍ liðinni viku lögðum við inn þá peninga sem söfnuðust i UNICEF- hreyfingunni („apahlaupinu“) í Oddeyrarskóla núna í júní.  Hlaupið er til styrktar UNICEF sem er Barnahjálp Sameinuðu þjóðanna.

Á heimasíðu UNICEF stendur meðal annars:

„Söfnunarfé UNICEF-hreyfingarinnar rennur í alþjóðlegan sjóð UNICEF, sem nýtir fjármunina í þeim samstarfslöndum þar sem þörfin er mest hverju sinni. Framlag skólans mun því renna til verkefna UNICEF um allan heim, hvort sem það verður til heilsugæslu, menntunar, verndar barna eða annars. Samvinna skólans, nemenda og grenndarsamfélags styður þannig þau börn sem líða skort vegna fátæktar,þjást af sjúkdómum og heilsuleysi eða eru fórnarlömb stríðsátaka eða náttúruhamfara“.

Nemendur í Oddeyrarskóla söfnuðu um 170.000 kr. fyrir hlaupið.

Skrifstofa UNICEF á Íslandi þakkar nemendum Oddeyrarskóla og aðstandendum þeirra innilega fyrir stuðninginn!

Skólaslit

Skólaslit verða í dag, föstudaginn 6. júní.

Skólaslit 1. – 7. bekkjar verða kl. 12:30 og skólaslit 8. – 10. bekkjar verða kl. 17:00.

Við bjóðum foreldra hjartanlega velkomna!

 

Skemmtilegir vordagar

Hamrar Hamrar2 Hamrar3Undanfarnir dagar hafa verið einstaklega skemmtilegir hjá okkur. Við höfum virkilega notið veðurblíðunnar og skundað hefur verið á ýmsa staði. Nemendur hafa í vikunni tekið þátt í styrktarhlaupi UNICEF, haldið íþróttamót, farið í ratleik og sund. Miðstigið var á Hömrum í dag og yngstu nemendurnir fóru í fjöruferð. 10. bekkurinn kom úr þriggja daga afar vel heppnaðri útskriftarferð á fimmtudagskvöldið. Myndir eru komnar á myndasíðu skólans og þeim fjölgar næstu daga.

Næsta vika

Nú er kominn vorhugur í okkur og erum við mikið úti þessa dagana.

Í næstu viku er talsvert um að vera, m.a. ferðalag 10. bekkjar en það stendur yfir dagana 3.-5. júní.

Hér er yfirlit yfir aðra dagskrá:

  • 30. maí: 1. og 7. bekkur fara í Lystigarðinn með elstu börnunum af Iðavelli.
  • 30. maí: Unglingastig og starfsfólk með íþróttakeppni.
  • 3. júní: UNICEF áheitahlaup (apahlaupið).
  • 4. júní: Ratleikur og sund.
  • 5. júní: Dagur með umsjónarkennara.
  • 6. júní: Útileikar á skólalóð og skólaslit: 1.—7. bekkur hittist kl. 12:30 á sal, skólaslit 8.—10. bekkjar verður kl. 17:00 á sal skólans.

 

Vísindamenn heimsóttu 3. bekk

IMG_2253 IMG_2251 Í gærmorgun voru nemendur og kennarar í 3. bekk svo heppnir að fá hressa vísindamenn í heimsókn til okkar í skólann. Það voru þau Auður Sigurbjörnsdóttir örverufræðingur og Sean Scully efnafræðingur frá Auðlindadeild Háskólans á Akureyri.

Auður sagði okkur frá ræktun á örverum og sýndi okkur nokkrar tegundir af þeim. Nemendur fengu síðan box með „örverumat“ í og máttu fikta í honum og freista þess að rækta sína eigin örverur. Spennandi að sjá hvað verður í boxinu eftir viku 🙂

Sean sýndi okkur nokkrar efnablöndur sem gefa frá sér mismuandi liti þegar þær komast í snertingu við orku/eld. Það var æsispennadi að sjá litadýrðina sem kom af efnablöndunum og ekki er ólíklegt að einhverjir hafi fundið framtíðarstarf sitt eftir þessa heimsókn.

Fleiri myndir úr heimsókninni má sjá á myndasíðu skólans.