Snillingarnir – þjálfun í samskiptum, tilfinningastjórn og athygli barna með ADHD

snillingarnirFjölskyldudeild Akureyrarbæjar býður börnum með ADHD að taka þátt í námskeiði til að efla færni á ýmsum sviðum. Námskeiðið er fyrir börn fædd árið 2004 og 2005 og eru 6 börn í hverjum hóp. Áhersla er lögð á að auka færni barna í félagslegum samskiptum, skapstillingu, sjálfsstjórn og að bæta athyglisgetu þeirra. Hópurinn hittist tvisvar í viku 2 tíma í senn, í 5 vikur (10 skipti alls) með tveimur þjálfurum. Eftirfarandi þættir eru teknir fyrir með börnunum í litlum hópum:

Tilfinninga- og reiðistjórnun: Börnunum eru kenndar ýmsar aðferðir við að stilla tilfinningar sínar þegar það er ekki viðeigandi að sýna þær, m.a. reiðistjórnun í samskiptum. Þar að auki læra þau um tilfinningar, svipbrigði og áhrif aðstæðna á líðan þeirra og annarra. Sú þekking mun nýtast þeim í samskiptum við aðra.

Félagsfærni: Farið er yfir atriði eins og hvernig og hvenær er viðeigandi að hefja samskipti við aðra, samskiptareglur og aukna færni í að setja sig í spor annarra.

Sjálfsstjórn: Kenndar eru aðferðir sem nýtast við að hamla hvatvísi og auka stjórn á eigin hegðun.

Þrautalausnir: Farið er yfir aðferðir við að leysa ýmis vandamál sem upp koma á skynsamlegan hátt. Í því felst að finna valmöguleika í stöðunni, hugsa um mögulega útkomu hvers valmöguleika og velja bestu lausnina til að ná ákveðnu markmiði.

Athyglisþjálfun: Í hverjum tíma eyðir hvert barn u.þ.b. 20 mínútum í tölvuforriti sem er ætlað að auka athyglisgetu, vinnsluminni og vinnsluhraða.

Þjálfarar á námskeiðinu verða Helga Vilhjálmsdóttir og Guðný Dóra Einarsdóttir sálfræðingar við Sérfræðiþjónustu skóla á Fjölskyldudeild.

Námskeiðið verður 10. mars–9. apríl, 2014 á mánudögum og miðvikudögum kl. 16:15-18:15, 10 skipti alls.

Til að sækja um Snillinganámskeiðið vinsamlegast sendið umsókn á þar til gerðu umsóknarblaði og sendið á Fjölskyldudeild fyrir 24. febrúar. Umsóknarblað geta forráðamenn fengið hjá skóla eða á Fjölskyldudeild. Nánari upplýsingar hjá Helgu Vilhjálmsdóttur og Guðnýju Dóru Einarsdóttur í síma 460-1420 eða  með tölvupósti á helgav@akureyri.is eða gudnydora@akureyri.is

Þátttökugjald: kr. 7.000 fyrir námskeiðið

umsoknareydublad_snillinga

Vel heppnaður útivistardagur í Hlíðarfjalli

Skíði 2014nr3 Skíði 2014nr1Í dag var útivistardagur hjá okkur í Oddeyrarskóla. Við fórum öll upp í Hlíðarfjall ýmist á gönguskíði, svigskíði eða bretti og virtust allir ánægðir með daginn.

Þeir nemendur sem ekki eiga skíða- eða brettabúnað gátu fengið hann lánaðan í Hlíðarfjalli og var undirbúningur starfsmanna Hlíðarfjalls til fyrirmyndar eins og alltaf. Því gekk ótrúlega vel að koma öllum í skó og skíði til að fara að renna sér í brekkunum. Veðrið var gott þrátt fyrir örlitla snjókomu en færið var frábært. Brekkurnar voru vel troðnar svo allir gátu sýnt sína bestu takta 🙂

Nemendur 3. og 4. bekkjar fengu skíðakennslu í boði Skíðafélags Akureyrar og Hlíðarfjalls fyrr í vetur og mátti sjá árangurinn af þeirri kennslu í dag.

Við þökkum starfsmönnum Hlíðarfjalls og Skóladeild Akureyrar kærlega fyrir frábæran dag!

Myndir eru komnar á myndasíðu skólans.

Dagur stærðfræðinnar

Í dag 7. febrúar er Dagur stærðfræðinnar. Markmið með deginum er tvíþætt; að vekja nemendur og sem flesta aðra til umhugsunar um stærðfræði og hlutverk hennar í samfélaginu og einnig að fá nemendur til að koma auga á möguleika stærðfræðinnar og sjái hana í víðara samhengi. Af þessu tilefni tóku allir á yngsta stiginu þátt í skemmtilegum stærðfræðiverkefnum í ýmsum myndum, fóru m.a. í bingó, Yatzy, spiluðu alls kyns spil og fleira. Myndir frá deginum má sjá á myndasíðu skólans.IMG_4859 IMG_4855

Frábær árshátíð afstaðin

8. bekkur nr410.bekkur nr7Árshátíð 2014nr22 Árshátíð 2014nr58

Um síðustu helgi var haldin árshátíð hér í Oddeyrarskóla. Alllir bekkir sýndu atriði og stóðu þeir sig frábærlega.

Sýnd voru fjölbreytt atriði, m.a. úr ýmsum sögum og ævintýrum. Góðlátlegt grín var gert að starfsmönnum skólans, nemendur sýndu listir sínar í íþróttum, stiklað var á stóru um vinsælustu hljómsveitir sögunnar og síðast en ekki síst var sýnd uppfærsla nemenda í 10. bekk á atriðum úr Dýrunum í Hálsaskógi. Foreldrafélag skólans styður einstaklega vel við árshátíðina m.a. með því að útvega leikstjóra fyrir 10. bekk og síðan stendur félagið fyrir stórglæsilegu kaffihlaðborði fyrir alla milli sýninga.

Dagurinn var ógleymanlegur og til að hjálpa okkur að halda í minningarnar tók Þórarinn Torfason skólasafnskennari og frístundaljósmyndari myndir af sýningunni og eru  þær væntanlegar á myndasíðu skólans.

Tónlistar- og leiklistarhópi unglingastigs boðið í leikhús

Gullna hliðiðFimmtudagskvöldið 16. janúar var leiklistar- og tónlistarhópi af unglingastigi  Oddeyrarskóla boðið til generalprufu á uppfærslu Leikfélags Akureyrar á leikverki Davíðs Stefánssonar, Gullna hliðinu. Jafnframt var hópnum boðið að eiga samtal við leikstjóra og leikmyndahönnuð að sýningu lokinni.

Vel var mætt og nutu nemendur sýningarinnar sem er í alla staði alveg frábær. Þótt texti verksins sé þungur þá er honum gerð afar góð skil og þannig að allar kynslóðir skilja hann vel. Nemendur voru sammála um leikurinn hafi verið tilþrifamikill auk þess sem leikmynd er frábærlega hönnuð.

Kennari og nemendur sem þáðu þetta boð leikhússins eru sammála um að þessi sýning henti fólki á öllum aldri og væri þannig frábær fjölskyldustund.  Þarna gefst líka tækifæri til að heiðra minningu Akureyrarskáldsins Davíðs Stefánssonar og halda í þann arf sem hann færði komandi kynslóðum.

Við þökkum leikfélagi Akureyrar innilega fyrir gott boð 🙂

Janúartengjan

Nú er Janúartengjan okkar komin í loftið. Tengjan er fréttabréf skólans og henni er ætlað að stuðla að auknu upplýsingaflæði milli heimila og skóla.

Tengjuna og eldri Tengjur má finna undir flipanum Tengja hér fyrir ofan.

Jólakveðja frá starfsfólki Oddeyrarskóla

Ágætu nemendur, foreldrar og aðrir velunnarar skólans!jólakerti_1

Um leið og við óskum ykkur og fjölskyldum ykkar gleðilegrar jólahátíðar þökkum við ánægjulegar samverustundir á árinu sem er að líða.

Megi nýja árið færa ykkur gleði og frið.

Jólakveðja,

starfsfólk Oddeyrarskóla

Jólaleg lokavika

laufabrauðÍ síðustu vikunni fyrir jól er mikið um að vera. Þriðjudaginn 17. desember ætlum við öll að skera laufabrauð og steikja. Nemendur geta síðan geymt sitt laufarbauð til næsta dags því þá er jólamatur í mötuneyti skólans. Á fimmtudaginn, 19. desember bjóða nemendur í 9. bekk og foreldrafélagið okkur öllum á jólalegt kaffihús þar sem boðið verður upp á heitt kakó og piparkökur. Föstudaginn 20. desember eru litlu-jól og þá hittast bekkir stutta stund í kennslustofum og svo förum við í salinn að dansa í kringum jólatréð. Það er því full ástæða til að hlakka til næstu daga 🙂