Lífshlaupið er byrjað!

Nú er fyrsta vika Lífshlaupsins hafin og við erum algjörlega tilbúin í slaginn, bæði nemendur og starfsfólk. Krakkarnir keppast við að hreyfa sig og safna hreyfimínútum í skólanum og utan skóla. Sumir ganga meira að segja svo langt að hjóla á spinninghjóli á bókasafninu og leysa verkefni á iPadnum á meðan!

Við hvetjum fjölskyldur til að nota þetta skemmtilega hreyfi- og lífsstílsátak til að safna hreyfimínútum saman, þetta er frábært tilefni til að fara saman í gönguferðir eða á skíði.

Áfram Oddeyrarskóli!

Lífshlaupið að hefjast!

Kæru foreldrar og forráðamenn!
Eins og allir vita er Oddeyrarskóli heilsueflandi grunnskóli.

Síðastliðin þrjú ár hafa starfsmenn skólans tekið þátt í Lífshlaupinu sem er verkefni á vegum Íþrótta-og Ólympíusambands Íslands. Í fyrra bættust nemendur við. Þeir gerðu sér lítið fyrir og komu, sáu og sigruðu!

Lífshlaupið gengur út á það að hvetja fólk til aukinnar hreyfingar í daglegu lífi. Þess ber að geta að í fyrra og árið áður sigruðu stafsmenn Oddeyrarskóla innanbæjarkeppnina! Við stefnum að sjálfsögðu á sigur enn eitt árið 🙂

Keppni nemenda gengur út á að bæta meiri hreyfingu inn í sitt daglega líf. Öll miðlungserfið og erfið hreyfing telur en nemendur þurfa að ná samtals a.m.k. 60 mínútna hreyfingu á dag. Nemendur á yngsta stigi fá skráningarblað með sér heim þar sem þau geta haldið utan um hreyfingu sína. Mikilvægt er að skrá alla hreyfingu yfir daginn (ath. að þessar 60 mínútur má taka í nokkrum áföngum yfir daginn). Umsjónarkennarar munu svo sjá um að færa skráninguna inn á vef Lífshlaupsins. Keppnin hefst miðvikudaginn 31. janúar og stendur í tvær vikur.
Við biðjum ykkur foreldra og forráðamenn að aðstoða börnin við þessa skráningu því við trúum því nú er að verja titilinn!

Með bestu kveðjum úr skólanum,
Heilsueflingarnefnd Oddeyrarskóla

Fyrirlestur fyrir foreldra um kynlíf og klám

Forvarna- og félagsmálafulltrúar á Akureyri bjóða foreldrum á fyrirlestur um kynlíf og klám:

Hvernig á ég að ræða við unglinginn minn um kynlíf?
Þriðjudaginn 30. janúar kl. 20 í Síðuskóla bjóða forvarna- og félagsmálafulltrúar á Akureyri foreldrum á fyrirlestur um kynlíf og klám með Siggu Dögg www.siggadogg.is

Sigga Dögg er kynfræðingur og hefur verið áberandi í fjölmiðlum undanfarin misseri þar sem hún fjallar á opinskáan hátt um allt sem að við kemur kynlífi.

 

Akureyrarbær leggur mikla áherslu á að vera í fararbroddi í forvarnarfræðslu og taka á þeim málum sem þurfa þykir hverju sinni.
Í því upplýsingasamfélagi sem við lifum í gegna ólíkir miðlar sífellt stærra uppeldishlutverki í lífi barna og unglinga. Kynfræðsla er ekki lengur einungis bundin við þá fræðslu sem skóli og foreldrar veita, heldur hefur hún í auknum mæli færst yfir til fjölmiðla. Markaðssetning á kynlífi sem er ætlað að höfða til barna og unglinga hefur aukist mjög á síðustu árum, til dæmis á netinu, í tónlistarmyndböndum, sjónvarpsþáttum og kvikmyndum.
Börn og unglingar fá mörg misvísandi skilaboð um kynlíf úr fjölmiðlum sem leitt geta til ranghugmynda um það hvað telst vera eðlilegt kynlíf. Þessi þróun undirstrikar mikilvægi uppeldishlutverks foreldra og að þeir leggi grunn að gildismati barna sinna á þessu sviði. Börn og foreldrar þurfa að ræða saman um kynlíf, eins og hvern annan málaflokk. Skoðanir og gildi foreldra gagnvart kynlífi eru börnum og unglingum nauðsynlegt mótvægi við þeim misvísandi og villandi upplýsingum sem þau hafa greiðan aðgang að.

Kynlíf er eðlilegur hluti af lífinu. Kynfræðsla fyrir börn og unglinga gerir þeim betur kleift að takast á við eigin tilfinningar og taka ákvarðanir sem stuðla að eigin kynheilbrigði. Með góðri fræðslu eru unglingar betur undir það búnir að takast á við þann félagslega þrýsting sem er í umhverfinu og þeir eru líklegri til að geta myndað gott og heilbrigt ástarsamband í framtíðinni. Þekking á kynlífi getur hjálpað þeim að vernda sig gegn kynferðislegri misnotkun og fyrir því að misnota aðra.

Eðlilegt að fjölskyldan ræði um kynlíf.
Fjölskyldan er ein sterkasta fyrirmynd barna og unglinga. Frá unga aldri hafa foreldrar samskipti við börn sín og miðla þekkingu til þeirra með beinum og óbeinum hætti. Umræða um kynlíf og allt sem því viðkemur er mikilvæg á öllum heimilum.

Opin og góð umræða um kynlíf á heimilinu skilar sér m.a. í því að:
– börn byrja seinna en ella að stunda kynlíf og eru ábyrgari þegar þau byrja
– minni líkur eru á að þau sjái eftir því að hafa stundað kynlíf
– minni líkur eru á ótímabærum þungunum og ofbeldi
– minni líkur eru á kynsjúkdómum

Kynfræðsla og opinská umræða um kynlíf skilar sér því í aukinni þekkingu og meðvitaðri ákvörðunartöku ungs fólks um kynlíf.

Útivistarvalið heimsótti björgunarsveitina

Útivistarvalið heimsótti björgunarsveitina Súlur síðastliðinn föstudag og fékk þar kynningu á starfi sveitarinnar. Hópurinn var áhugasamur um starfið og er aldrei að vita nema þarna leynist björgunarsveitarfólk framtíðarinnar. Við þökkum Súlumönnum kærlega fyrir góðar móttökur!

Gleðilegt nýtt ár!

Kæru foreldrar / forráðamenn barna í Oddeyrarskóla!

Um leið og við óskum ykkur öllum gleðilegs árs með þakklæti fyrir samstarfið og samveruna á því gamla minnum við á að skólastarf hefst á ný fimmtudaginn 4. janúar 2018.

Hlökkum til að sjá alla endurnærða eftir langt og gott frí.

Stjórnendur Oddeyrarskóla

Jólafjör í Oddeyrarskóla

Undanfarnir dagar hafa einkennst af ýmsum jólahefðum sem við í Oddeyrarskóla höfum haldið við í fjölmörg ár. Þessar jólahefðir kalla á góða samvinnu nemenda og starfsfólks sem    okkur finnst svo dýrmæt. Þann 1. desember spilum við félagsvist í íþróttasal skólans og svo annaðist 9. bekkurinn kaffihús í boði foreldrafélagsins. Að sjálfsögðu skárum við og steiktum laufabrauð þann sama dag og Hrafnhildur og Marta buðu upp á fínan jólamat. Það er um að gera að njóta aðventunnar, hvort sem er heima eða í skóla. 

Oddeyrarskóli fagnar 60 ára afmæli

Fimmtudaginn 7. desember fagnaði Oddeyrarskóli 60 ára afmæli sínu. Undirbúningur fyrir hátíðahöldin stóðu í alllangan tíma, til dæmis voru smiðjudagar í lok nóvember helgaðir afmælinu.

Afmælisdagurinn sjálfur hófst með hátíð á sal skólans. Þar mættu nemendur, starfsfólk og um 35 boðsgestir. Núverandi skólastjóri, Kristín Jóhannesdóttir og forveri hennar, Helga Hauksdóttir, fluttu ræður. Nemendur sýndu einnig hvað í þeim býr með söng og dansi. Nemendur annars bekkjar sungu gamlan skólasöng Oddeyrarskóla, rappsveitin Blautir sokkar flutti tvö lög, ásamt dansatriði, nemendur á unglingastigi sýndu frumsaminn dans gegn einelti og þrír nemendur unglingastigs röppuðu um skólann. Í lok dagskrár á sal komu þeir Ívar og Ívan Mendez frá Tónlistarskólanum á Akureyri og léku undir fjöldasöng og er óhætt að segja að stemningin var góð. Þeir hafa stýrt söngstundum hjá okkur í vetur er ljóst að sú vinna hefur skilað sér.

Foreldrafélagið gaf skólanum góðar gjafir sem nýtast munu nemendum vel, bæði búnað til daglegrar hreyfingar í skólanum og fatboy púða á bókasafnið. Þá gáfu hinir skólar bæjarins inneign í Eymundsson, sem mun nýtast til bókakaupa í LESTU-hilluna góðu. Við þökkum innilega fyrir góðar gjafir.

Að lokinni dagskrá á sal var boðið upp á afmælisköku. Þá tók við opið hús þar sem fjöldi gesta kom og kynnti sér skólastarfið. Eitt og annað var í boði og má þar nefna að nemendur sýndu afrakstur þemadaga þar sem unnið var með sögu skólans, dans gegn einelti, myndband um skólann og geysiflott líkön sem nemendur gerðu af húsnæði skólans. Þá sýndu nemendur gestum hvernig þeir nýta tæknina til náms og hvaða möguleika hún býður uppá. Gestir fengu til dæmis að búa til eigin tónlist, stýra litlum vélmennum, kóða og taka þátt í just dance. Jafnframt fengu gestir að sjá hvernig nemendur læra á fjölbreyttan hátt, svo sem með byrjendalæsi, samræðum í námi, Zankow stærðfræði, sköpun og svo framvegis.

Fjölmargir gestir heimsóttu skólann og þökkum við öllum innilega fyrir komuna og góðar kveðjur.