Viðurkenningar Fræðsluráðs Akureyrarbæjar voru afhentar í Hofi síðastliðinn miðvikudag, en þar fengu Vala Alvilde Berg, nemandi við 9. bekk Oddeyrarskóla og kennararnir Hafdís og Linda viðurkenningar.

Vala hlaut viðurkenningu fyrir að vera ábyrgur námsmaður og góður skólaþegn. Hún er ábyrgur námsmaður sem nær framúrskarandi árangri. Hún er sterkur leiðtogi sem tekst að virkja hópa til góðra verka. Vala er nemandi sem hikar ekki við að vinna krefjandi verkefni og er dugleg að spyrja og velta hlutunum fyrir sér. Hún hefur góða nærveru og er góður skólaþegn. Hún er skapandi og kemur hugmyndum sínum í framkvæmd.  

Hafdís Bjarnadóttir og Linda Óladóttir, kennarar við Oddeyrarskóla, hlutu í gær viðurkenningu Fræðsluráðs Akureyrarbæjar fyrir framlag sitt til bætts skólasamfélags í Oddeyrarskóla. Viðurkenningar Fræðsluráðs voru afhentar í Hofi í gær, miðvikudaginn 23. ágúst.

Hafdís og Linda gegna gríðarmiklu hlutverki í að efla og viðhalda góðum skólabrag í Oddeyrarskóla. Þær hafa sýnt einmuna frumkvæði að því að gera skólann okkar betri, fallegri og heilsusamlegri.

Fyrst ber að nefna framtakssemi þeirra við að koma upp LESTU hillunni í anddyri skólans. Þær létu draum okkar margra verða að veruleika eftir að hafa gengið á milli fyrirtækja til að fá gott tilboð í smíðina og söfnuðu peningum til að þessi frábæra hugmynd yrði að veruleika. 

Hafdís og Linda tóku sig til í vetur og prjónuðu húfur til að gefa öllum nemendum 1. bekkjar. Húfurnar bera mikilvæg skilaboð, en á þeim stendur GEGN EINELTI. Nemendur 1. bekkjar fengu húfurnar afhentar þegar þeir höfðu lokið við að lesa og vinna með bókina um Litlu lifruna ljótu, en sú bók gefur gott tilefni til að læra um samskipti og einelti. 

Þær stöllur eru mjög öflugir leiðtogar í stýrihópi um heilsueflandi grunnskóla. Þær hafa unnið ötullega að innleiðingu heilsueflandi grunnskóla, en innleiðing hófst á nýliðnu skólaári. Þær eru gríðarlega hvetjandi og kappsamar og þegar starfsfólk og nemendur tóku þátt í Lífshlaupinu í febrúar áttu þær stóran þátt í að hvetja nemendur til sigurs og starfsmenn í 2. sætið í sínum flokkum.

Hafdís og Linda hafa einstakan metnað og bera hag nemenda og skólans alls fyrir brjósti.

Nemendur í Oddeyrarskóla hafa ánægju af lestri, það sést vel í könnunum Skólapúlsins, sem lagðar hafa verið fyrir frá hausti 2011. Síðastliðinn vetur jókst þó ánægja nemenda skólans af lestri umtalsvert, svo mjög að starfsmaður frá Skólapúlsinum hafði samband við skólann og spurði hvort eitthvað sérstakt hefði verið gert sem hefði þessi jákvæðu áhrif.  

Sex spurningar liggja að baki mælingunni:  

• Ég les bara þegar ég verð að gera það.
• Lestur er eitt af uppáhaldsáhugamálum mínum.
• Mér finnst gaman að tala um bækur við aðra.
• Ég verð ánægð(ur) þegar ég fæ bók að gjöf.
• Lestur er tímasóun fyrir mig.
• Mér finnst gaman að fara í bókabúð eða á bókasafn.

Sem dæmi má nefna að þegar nemendur Oddeyrarskóla eru spurðir að því hvort lestur sé eitt af uppáhaldsáhugamálum þeirra svara 52% nemenda í Oddeyrarskóla því að þeir séu sammála eða mjög sammála því en 33% nemenda á landinu í heild.  56% nemenda í Oddeyrarskóla eru sammála eða mjög sammála því að þeim finnist gaman að tala um bækur við aðra en 37% nemenda á landinu í heild.

Þegar við fórum að velta fyrir okkur hver skýringin gæti verið datt okkur fyrst í hug uppsetning LESTU hillanna á Degi íslenskrar tungu í nóvember 2016 og sú mikla umræða sem varð um lestur í kjölfarið. Sýnileiki hillanna hefur líka áhrif, þar sem allir nemendur 5. – 10. bekkjar ganga fram hjá þeim daglega og aðrir nemendur talsvert oft. Þessi skýring passar vel við niðurstöður Skólapúlsins því mælingin sem gerð var í október var einungis rétt yfir landsmeðaltali en mælingar í janúar og apríl langt yfir.  

LESTU hillurnar virðast svo sannarlega hafa sannað gildi sitt.

Föstudaginn 2. júní var Oddeyrarskóla slitið í 59. sinn.

Árgangur 2001 var útskrifaður við hátíðlega athöfn og var að venju glæsilegt kaffisamsæti útskrifarnema, fjölskyldna þeirra og starfsmanna að athöfn lokinni. Við óskum útskrifarnemum innilega til hamingju með áfangann og óskum þeim góðs gengis á nýjum vettvangi.

Við færum jafnframt nemendum okkar, foreldrum þeirra og starfsfólki Oddeyrarskóla okkar bestu þakkir fyrir samstarfið og samveruna í vetur. 

Hafið það sem allra best í sumar!

Fjóla, Kristín og Rannveig,

stjórnendur Oddeyrarskóla

Sjötti bekkur fór í óvissuferð fimmtudaginn 25. maí á vegum foreldra í bekknum. Byrjað var á að bruna að Goðafossi og hann skoðaður. Síðan var farið að Laugum þar sem krakkarnir (og nokkrir fullorðnir) skelltu sér í sund, nesti var borðað og mikið spjallað. Næst brenndum við í bústað í Aðaldalnum, þar sem krakkarnir léku sér og fullorðnir kjöftuðu frá sér allt vit ? Pylsur voru grillaðar og lék veðrið við hópinn. Á heimleiðinni var farið í Samgönguminjasafnið á Ystafelli. Frábær dagur með skemmtilegum ferðafélögum.

Á föstudaginn síðastliðinn kynntu nemendur í 8. – 10. bekk afrakstur þemavinnu fyrir foreldrum, öðrum nemendum og starfsfólki. Þemað fjallaði um umhverfismál. Meginmarkmið þemavinnu á unglingastigi er að fræðast um ákveðin viðfangsefni og um leið þjálfa nemendur í lykilhæfni aðalnámskrár. Í umhverfisþemanu unnu nemendur margvísleg verkefni, en markmið þeirra var að nemendur gætu greint og rætt dæmi í umhverfi sínu, að þeir gætu komið skoðun sinni á framfæri, að þeir gerðu sér grein fyrir ábyrgð sinni í samfélaginu og að þeir gætu útskýrt dæmi úr eigin lífi. Nemendur fengu nokkuð frjálsar hendur um skil á verkefnum og völdu þeir t.d. að vinna með listsköpun, fræðsluefni, myndbandagerð og tónlist.

Sama dag kynntu nemendur í 10. bekk lokaverkefni í stærðfærði. Þar unnu þeir saman í hópum að margvíslegum verkefnum sem reyndu á stærðfræði. Verkefni nemenda voru fjölbreytt, þeir stofnuðu m.a. handboltalið og ráku í eitt ár, keyptu og ráku hótel, stofnuðu framhaldsskóla, gerðu lag um stærðfræði, gerðu tölfræðilega könnun um peninganotkun unglinga og áætluðu kostnað við að reka húsnæði og fjölskyldu. Markmið með verkefnunum var að fá nemendur til að nota eitthvað af því sem þeir hafa lært undanfarið í stærðfræði í tengslum við daglegt líf.

Vorþema miðstigs þetta árið fjallar um hafið. Við höfum unnið í mismunandi hópum og meðal annars horft á myndbönd frá N4 um skip og veiðarfæri. Við höfum safnað upplýsingum af netinu og úr bókum og nýtt í vinnu með fræðslugrunna, við höfum búið til hugtakakort, teiknað myndir af fiskum og lært mjög margt. Lögð var áhersla á fjölbreytt vinnubrögð, fjölbreytt efni og samvinnu. Afrakstur vinnunnar hangir upp á veggjum um allt miðstig 🙂

Fyrir nokkru var 100 miða leikurinn haldinn hér í Oddeyrarskóla, en hann er hluti af SMT starfinu okkar. Leikurinn gengur út á að 100 nemendur skólans fá stjörnur fyrir að fylgja einkunnarorðum skólans, ábyrgð, virðing og vinátta. Þessir nemendur draga númer á bilinu 1-100 og staðsetja sig á 100 töflunni. Að leik loknum er ein röðin í 100 töflunni dregin út og voru það nemendurnir sem höfðu fengið töluna 3 sem voru dregnir út að þessu sinni (3-13-23 o.s.frv.).

Í dag var umbunardagur fyrir þennan hóp og fólst umbunin í að heimsækja N4 sem eru flutt í Linduhúsið á Eyrinni. Þar tók Herdís Helgadóttir dagskrárgerðarmaður á móti okkur og kynnti vinnustaðinn fyrir okkur. Við þökkum Herdísi og N4 kærlega fyrir góðar mótttökur og áhugaverða fræðslu.

Að þeirri heimsókn lokinni skunduðum við á neðstu hæðina þar sem Axelsbakarí er til húsa og gæddum okkur á kruðeríi.