Nemendur í 10. bekk hafa undanfarið unnið í náttúrufræði að nýsköpun. Nemendur unnu í hópum við að finna hugmyndir sem uppfylltu einhverja þörf í lífi þeirra á einhvern hátt. Þeir skiluðu af sér líkani og kynntu það. Á mánudaginn var foreldrum og nemendum á mið- og unglingastigi boðið á kynningu þar sem hóparnir sýndu sitt framlag. Nýsköpunin var fjölbreytt s.s. glær brauðrist, vélmenni sem sér um heimilisstörf, svifbretti og orkudrykkur. Verkefnin voru fjölbreytt og skemmtileg. Á myndunum má sjá nemendur kynna sínar hugmyndir.

Á Akureyri eru starfræktar fimm félagsmiðstöðvar sem allir grunnskólar sveitarfélagsins hafa aðgang að. Allt starfsfólk Félak vinnur að sameiginlegum markmiðum og þjónustar aldurshópinn 10 – 16 ára.

Katrín Ósk Ómarsdóttir er okkar helsti tengiliður, en hún er umsjónarmaður félagsmiðstöðvarinnar Stjörnuríkis, en svo kallast félagsmiðstöðin okkar í Oddeyrarskóla. Umsjónarmenn félagsmiðstöðvanna starfa sem forvarna- og félagsmálaráðgjafar hjá Akureyrarbæ og sjá því einnig um aðgerðaráætlun forvarna fyrir 0 – 25 ára samhliða starfinu í félagsmiðstöðvunum.

Börn og unglingar í bænum geta sótt þá félagsmiðstöð sem þau kjósa óháð sínum heimaskóla. Opið er fjögur kvöld í viku í mismunandi félagsmiðstöðvum fyrir unglinga og einnig eru reglulegir viðburðir um helgar. Að auki er fjölbreytt klúbbastarf fyrir alla aldurshópa sem dreifist á alla virka daga. Í öllum grunnskólum er kennd valgrein, félagsmálafræði, fyrir nemendur í 9. og 10. bekk. Meðal verkefna valsins eru kompás mannréttindafræðsla, umræður, hópefli, sjálfsstyrking, skipulagning félagsmiðstöðvar viðkomandi skóla og viðburðarstjórnun.

Katrín og Arnór Heiðmann eru með opið hús á mánudögum fyrir nemendur í 8.-10. bekk, einnig er klúbbakvöld á miðvikudagskvöldum fyrir sama aldur en Arnór og Arna halda utan um það starf. Miðstigsopnun (5.-7. bekkur) er að loknum skóla á þriðjudögum og er hún í umsjón Katrínar ásamt nemendum í valgreininni.

Hér vinstra megin á heimasíðu skólans má sjá tengil þar sem dagskrá ársins er vel útlistuð. Við hvetjum nemendur og foreldra að kynna sér dagskrána vandlega og nýta þá afþreyingu og þjónustu sem í boði er.

Í öllu starfi Félak eru forvarnir hinn rauði þráður starfsins sama hvort það er í leikjaformi eða beinni fræðslu. Forvarnarstarf hefur löngum sannað gildi sitt í að draga úr áhættuhegðun og annars konar óæskilegum áhrifum á lýðheilsu barna og unglinga.

Umsjónarmenn félagsmiðstöðvanna eru jafnframt umsjónarmenn forvarna. Það fyrirkomulag eykur samstarf Félak við skólanna og auðveldar á margan hátt skipulag og annað samstarf. Starfsmenn hafa unnið forvarnardagatal með yfirliti yfir þá fræðslu sem fram fer í skólanum á skólaárinu. Meðal þeirrar fræðslu sem nemendur skólans munu njóta, eftir því í hvaða bekk þeir eru, er um jafnrétti og hamingju, fræðsla um netnotkun, fræðsla um fjármálavit, erindi frá Grófinni – geðverndarsamtökum, vímuefnafræðsla og hinsegin fræðsla. Eins og síðustu ár ætlar Sigga Dögg að fræða nemendur 8. bekkjar um kynlíf og 7. bekkur fær fræðslu um netið og samskipti. Of langt mál er að segja frá öllu sem framundan er, en inn á heimasíðu Rósenborgar, www.rosenborg.is er hægt að skoða velferðaráætlun sem gildir frá 2015-2017.

• Fréttabréf Stjörnuríkis, oktober-2016
• Dagskrá Stjörnuríkis – oktober 2016
• Dagskrá miðstigs – október

Marta eldvarnarfulltrúi og Jói húsvörður bera saman bækur sínar að rýmingu lokinni.

Nemendur unnu fjölbreytt verkefni. Í myndlistarstofunni voru tré máluð á frumlegan og skrautlegan hátt.

Dagurinn í dag var einn af þessum dásamlegu dögum í skólastarfinu!

Hinn árlegi fjölgreindadagur var í dag og unnu allir nemendur skólans á aldursblönduðum stöðvum um allan skóla, 18 mínútur á hverri stöð. Við leitumst við að vera með fjölbreyttar stöðvar sem þjálfa nemendur á sviðum ólíkra greinda Gardners.

Meðal viðfangsefna dagsins voru trjámálun, ýmsar íþróttaþrautir, rúmfræðiþrautir, að þekkja fuglahljóð, spurningakeppni í Kahoot og að þrykkja á og sauma fjölnota innkaupapoka. Elstu nemendur skólans eru hópstjórar og bera ábyrgð á hópnum sínum allan daginn. Vinapör eru saman svo yngri nemendur njóta góðs liðsinnis vina í eldri árgöngum skólans.

Öllum að óvörum (nema Mörtu eldvarnarfulltrúa) fór eldvarnarkerfið af stað í miðjum klíðum. Rýma þurfti skólann skv. rýmingaráætlun. Nú reyndi á, því aðstæður voru heldur óvenjulegar. En æfingin gekk ljómandi vel og voru allir nemendur komnir á sinn stað á grasvellinum á tveimur mínútum. Stefnt er að næstu æfingu í vor.

Fleiri myndir eru væntanlegar á myndasíðu.

Aðalfundur Foreldrafélags Oddeyrarskóla

verður haldinn 11. október kl. 20:00 í matsal skólans

Dagskrá:

1. Skýrsla formanns um störf félagsins og umræða um hana.
2. Lagðir fram reikningar fyrir síðasta ár.
3. Umræða og atkvæðagreiðsla um reikninga.
4. Kosning tveggja skoðunarmanna reikninga.
5. Kosning stjórnar.
6. Lagabreytingar.
7. Skipun tveggja fulltrúa í skólaráð.
8. Ákvörðun félagsgjalda og umræða.
9. Önnur mál.

Á morgun verður fjölgreindadagur þar sem nemendur vinna saman í aldursblönduðum hópum í margvíslegum verkefnum. Allir fá að prófa allt sem er í boði og spreyta sig á ólíkum hlutum í anda fjölgreindakenninga. Dagurinn er styttri en venjulega og allir búnir í skólanum um kl. hálfeitt. Nemendur sem eru í frístund fara þangað snemma fyrir vikið. Frjálslegt nesti er í boði þennan dag t.d. safi og kleina eða eitthvað slíkt 🙂 

Nýlega æfðum við að rýma skólann en í komandi viku verður haldin önnur rýmingaræfing í skólanum þar sem við höfum verið að fínpússa rýmingaráætlun skólans í kjölfar fyrri æfingar. Því biðjum við nemendur um að vera með auka sokka í töskunni þessa viku, því þegar rýming er æfð er ekki gert ráð fyrir að
nemendur hafi tíma til að klæða sig í skó.

Nemendur í 8. – 10. bekk hafa verið duglegir að taka þátt í verkefni Íþrótta- og Ólympíusambands Íslands, Göngum í skólann. Þegar nemendur koma í skólann hafa þeir sett miða við inngang í stofur sem táknar hvernig þeir komu í skólann. Grænn miði merkir að nemandinn kom gangandi eða á hjóli og appelsínugulur miði merkir að nemandinn fékk far í skólann. Grænu miðarnir hafa verið mun fleiri en appelsínugulu miðarnir og er nokkur samkeppni milli bekkja að hafa sem flesta græna miða.

Síðastliðinn vetur tóku nokkrir skólar á Eyjafjarðarsvæðinu sig saman og sóttu um þróunarstyrk til Sprotasjóðs til að halda menntabúðir í upplýsingatækni til að kennarar fái tækifæri til að efla sig á þessu sviði kennslunnar. Átta menntabúðir voru haldnar undir formerki #Eymenntar síðasta vetur og gengu þær út að kennarar miðluðu milli sín hugmyndum og reynslu í upplýsingatækni. Oddeyrarskóli bættist í hóp umsækjenda á þessu ári og fékkst styrkur til að halda sex menntabúðir þennan veturinn undir formerkjum #Eymenntar.

Fyrstu menntabúðir vetrarins voru haldnar í Oddeyrarskóla í dag og voru þær undirbúnar af kennurum úr Oddeyrarskóla og Brekkuskóla. Kennarar höfðu tækifæri til að kynna sér og ræða saman um Google Classroom, Moodle í stærðfræðikennslu, EdPuzzle, kóðun, myndbandagerð í Imovie, gagnaukinn veruleika í námi, Quislet og skipulagsforritið Symphonical.

Þátttaka kennara var mjög góð, en líklegt þykir að þátttakendur hafi verið liðlega 80 talsins. Við þökkum þessum kennurum innilega fyrir komuna og hlökkum til næstu menntabúða #Eymenntar.

Í dag, á meðan 7. bekkurinn lagði undir sig tölvuverið til að taka fyrstu rafrænu samræmdu könnunarprófin, fengu krakkarnir úr 3. og 4. bekk sem eru í upplýsingatæknismiðju hjá Svölu tækifæri til að vígja glænýjar og stórgóðar Chromebook fartölvur skólans.

Krakkarnir, sem hafa verið í þessari smiðju 3x í viku frá upphafi skólaársins, hafa verið að læra ýmislegt sem tengist upplýsingamennt og sýndu þeir skólastjóra í dag færni sína í forritun og gerð kynninga þar sem þeir notuðust við skyggnur á Google classroom og Prezi kynningar. Nemendur eru virkilega móttækilegir í tæknimálum og verður gaman að fylgjast með námi þeirra í framtíðinni.

Nýverið voru keyptar 16 öflugar Chromebook vélar í Oddeyrarskóla og eru þær ætlaðar nemendum. Fartölvuvagn er væntanlegur í byrjun október, en hann auðveldar alla umgengni um vélarnar. Við hlökkum virkilega til að koma þessum vélum í mikla notkun hjá öllum nemendum Oddeyrarskóla.

Á morgun, fimmtudag, taka nemendur í 7. bekk samræmd próf í íslensku. Á föstudag þreytar þeir síðan próf í stærðfræði. Sú nýbreytni er að þessu sinni að prófin eru tekin á tölvur og hafa þau verið stytt verulega frá því sem áður var. Tölvuver skólans er tilbúið fyrir próftökuna og starfsmenn klárir í slaginn.

Á fimmtudag og föstudag í næstu viku þreyta nemendur í 4. bekk samræmd könnunarpróf í íslensku og stærðfræði.