Forvarnardagur gegn einelti er 8. nóvember ár hvert. Í dag gaf skólinn öllum nemendum í 1. bekk og þeim sem eru nýir í 2. – 4. bekk handprjónaðar húfur sem á stendur: Gegn einelti. Þetta er í fjórða sinn sem við í Oddeyrarskóla gerum þetta en starfsmenn prjónuðu húfurnar. Húfurnar eru merktar hverju barni og hver húfa er með sína liti og eru þær fjölbreytilegar í útliti eins og nemendahópurinn. Við hófum daginn með söngstund í 1. – 4. bekk og lögin sem við sungum í dag voru öll tileinkuð vináttunni. Húfurnar voru svo afhentar í lok þeirrar samverustundar.

Á forvarnardegi gegn einelti er ákveðið viðfangsefni í hverjum árgangi til að vekja sérstaka athygli á þeirri vá sem einelti er og mikilvægi þess að standa saman. Samskiptamál og mikilvægi virðingar og vináttu eru þó rædd mun oftar í skólanum og ber á góma flesta daga. Í Oddeyrarskóla er stuðst við forvarnarefni gegn einelti sem kallast „Stöndum saman“ en þar er fræðsla um hvað einelti er og leiðir til að bregðast við óæskilegri hegðun og framkomu.

Á viðtalsdegi þann 16. október var foreldrum skólans boðið að sækja fræðslu í skólanum í formi menntabúða og fræðsluerinda. Sérfræðingar innan og utan skóla tóku að sér fræðsluna og var í þetta sinn hægt að velja á milli nokkurra ólíkra erinda. Menntabúðir voru um 30 mínútur hver og gátu allir valið að mæta á eina til fjórar slíkar á milli klukkan tvö og fjögur þennan dag. Könnun var gerð á áhuga foreldra í formi skráningar í gegnum tölvupóst en allir gátu mætt óháð þeirri skráningu. Við vorum mjög ánægð með mætinguna og vonum að þeir sem komu hafi haft gagn og gaman af. Við höfum undanfarið ár verið að taka lítil skref í áttina að því að breyta fyrirkomulagi á viðtalsdögum í Oddeyrarskóla og höfum við hug á að halda áfram að þróa þetta samstarf og samtal við foreldra með það að leiðarljósi að styrkja skólasamfélagið, auka tengsl og bæta almennt skólastarf. Við þökkum foreldrum og starfsfólki fyrir daginn, við finnum fyrir miklum stuðningi og vilja allra til að þróa samstarfið áfram. 

Fimmtudaginn 3. október var fjölgreindardagur í Oddeyararskóla. Hefðbundin stundaskrá var brotin upp. Nemendum var blandað í námshópa þvert á aldur þar sem og voru hópstjórar elstu nemendur í hverjum hópi, oftast nemendur í 10. bekk. Farið var milli námsstöðva þar sem fjölbreytnin var í fyrirrúmi og stuðst við fjölgreindarkenningu Gardners. Dæmi um viðfangsefni er steinamálun, hreyfing, hugarflæði og leikir. Í frímínútum var boðið upp á skúffuköku, mjólk og ávexti í tilefni þess að nemendur náðu að safna 5000 þrumum sl. vor. Þegar þessari dagskrá var lokið var farið í íþróttasalinn. Þar fengu þeir nemendur sem hraðast hlupu í skólahlaupinu viðurkenningu. Að lokum dönsuðu allir, stórir og smáir zumba og skemmtu sér vel. Hér má sjá myndir frá deginum og hér koma myndir frá kaplakubba stöðinni.

Miðvikudaginn 19. september sl. var Ólympíuhlaup ÍSÍ en sambærilegt hlaup hefur verið í grunnskólunum um árabil og var þá nefnt Norræna skólahlaupið. Eldri nemendur Oddeyrarskóla hlupu skólahringinn svokallaða sem markast af Grenivöllum, Ægisgötu, Eyrarvegi og Sólvöllum og fóru að lágmarki tvo hringi en yngri nemendur hlupu að lágmarki tvo hringi kringum skólalóð. Að hlaupi loknu var boðið upp á niðurskorna ávexti við skólann og einnig var spiluð tónlist sem setti skemmtilegan svip á daginn. Viðurkenningar verða veittar fyrir besta tíma á hverju stigi en það verður gert við hentugt tækifæri. Hér má sjá myndir frá deginum.

Fulltrúar frá foreldrafélagi Oddeyrarskóla komu færandi hendi í morgun þar sem þeir gáfu öllum nemendum skólans vatnsbrúsa. Brúsinn er appelsínugulur, sem hefur undanfarin ár verið litur skólans í keppninni Skólahreysti. Hann er merktur Foreldrafélagi Oddeyrarskóla og nafni hvers nemenda. Þetta er góð og nytsamleg gjöf og færum við í Oddeyrarskóla foreldrafélaginu hinar bestu þakkir fyrir. Myndir

Lestrarvinir er samstarfsverkefni Rauða krossins og Amtbókasafnsins á Akureyri fyrir börn á aldrinum 2-8 ára. Með því að taka þátt í verkefninu gefst tækifæri til að styðja við lestrarnám barnanna. Nánari upplýsingar og umsóknareyðublað má finna hér.

Síðastliðið vor ákvað umhverfis- og mannvirkjaráð Akureyrarbæjar að ráðast í úttekt á loftgæðum í skólamannvirkjum. Í sumar var gerð úttekt á húsnæði Oddeyrarskóla. Að mati sérfræðinga frá verkfræðistofunni Verkís var niðurstaðan sú að ástand skólans sé mjög gott og engin ástæða til að ætla að loftgæði geti á nokkurn hátt hamlað skólastarfi. Gildi myglu voru mæld bæði með loft- og snertisýnum. Ábendingar komu fram um lítils háttar úrbætur á afmörkuðum svæðum og var strax hafist handa við þær en þær fólust í sótthreinsun og staðbundnum viðgerðum. Þau gildi myglu sem þar mældust eru vel innan eðlilegra marka miðað við það sem almennt gerist í húsnæði á Íslandi. Loftræsting var bætt í þeim tveimur kennslustofum sem athugasemdir voru gerðar við. Ætlunin er að fylgja málinu eftir og mæla loftgæði í skólanum þegar starfsemi verður í húsinu en það verður gert þegar líða tekur á skólaárið.

Þann 4. september hófst átakið göngum í skólann. Við hvetjum alla til að koma gangandi eða á hjólum. Einnig má nota almenningssamgöngur en reynum að forðast að nota einkabíl. Átakið stendur yfir í fjórar vikur eða til 2. október. Í skólanum hafa kennarar gert ýmislegt til að minna á átakið og skrá niður fararmáta.

Oddeyrarskóli verður settur fimmtudaginn 22. ágúst. Allir nemendur í 2. – 10. bekk mæta á sal skólans kl. 9:00. Nemendur í 1. bekk eru einnig velkomnir. Þar verður stutt ávarp skólastjóra en nemendur fara síðan með sínum umsjónarkennara í heimastofur. Kennsla hefst samkvæmt stundaskrá föstudaginn 23. ágúst.