Allt skólahald fellur niður í dag miðvikudaginn 11. desember, í leik- og grunnskólum Akureyrarbæjar og í Tónlistarskólanum á Akureyri vegna veðurs og ófærðar.

Skólahald fellur niður á Akureyri frá kl. 13. Frístund lokar einnig þá.

Við mælumst til að foreldrar barna í 1. – 4. bekk sæki börn sín og óskum eftir að þeir foreldrar sem vilja að yngri börn gangi heim láti vita í síma 4609550 eða sendi póst til rannveig@oddeyrarskoli.is. Nemendur í 5. – 10. bekk mega ganga heim að hádegishléi loknu en ef foreldrar ætla að sækja eldri börn þarf að láta okkur vita svo við getum komið skilaboðum til þeirra.

Ekki hefur verið tekin ákvörðun varðandi morgundaginn, við látum ykkur vita um leið og ákvörðun liggur fyrir.

Skólahald verður með eðlilegum hætti í dag en við fylgjumst með þróun veðurs. Spár gera ráð fyrir að veður versni þegar líða tekur á daginn.

Kæru foreldrar og forráðamenn

Veðurspá er fremur slæm fyrir morgundaginn og nokkrir hafa haft samband til að spyrja um skólahald. Það eru sameiginlegar verklagsreglur fyrir alla grunnskólana á Akureyri og ágætt að rifja upp ef slæmt veður er í aðsigi. Vonum samt það besta og að veðrið verði milt og gott hjá okkur á Akureyri.

Verklagsreglur
Tilkynning lögreglu. Ef veður eða færð er með þeim hætti að morgni að lögregla mælir með því að skólahald verði fellt niður, er brugðist við því. Þá fellur niður allt formlegt skólahald í leik- og grunnskólum Akureyrarbæjar, samkvæmt tilmælum lögreglu.

Sviðsstjóri fræðslusviðs er í slíkum tilvikum í sambandi við lögreglu að morgni og kemur tilkynningu í RÚV og Bylgjuna um að kennsla sé felld niður í leik- og grunnskólum á Akureyri. Er þá gert ráð fyrir því að fyrsta tilkynning sé birt kl. 7.00 að morgni. Sviðsstjóri fræðslusviðs sendir þá sms til leik- og grunnskólastjórnenda með tilkynningu um að skólahald falli niður. Skólastjórnendur sendi þá þegar á sína starfsmenn upplýsingar um stöðu mála.

Ábyrgð foreldra. Almennt þegar vond vetrarveður ganga yfir verða foreldrar ávallt að meta sjálfir hvort óhætt sé að senda barn í skólann ef ekki hefur komið tilkynning frá lögreglu um að skólahald skuli falla niður. Í hverjum skóla er alltaf einhver hluti starfsmanna mættur til að taka á móti þeim börnum sem kunna að mæta, ef upplýsingar um lokun að tilmælum lögreglu hafa ekki náð til foreldra að morgni. Sé barn heima vegna veðurs eða ófærðar þarf að tilkynna það í sms/síma eða með tölvupósti.

Ábyrgð skólayfirvalda. Af öryggisástæðum er hver skóli ábyrgur fyrir því að stjórnandi/starfsmaður sé kominn í skólann að morgni fyrir skólabyrjun ef vera skyldi að einhverjir mættu. Þeir eru þá upplýstir um að skólahald falli niður og nemendur/leikskólabörn skuli vera heima. Tryggja skal öryggi ungra grunnskólabarna, að þau séu ekki send ein heim aftur heldur tryggt að ábyrgðaraðili sæki. Af öryggisástæðum verða einhverjir að vera í húsi til kl. 10:00.

Forvarnardagur gegn einelti er 8. nóvember ár hvert. Í dag gaf skólinn öllum nemendum í 1. bekk og þeim sem eru nýir í 2. – 4. bekk handprjónaðar húfur sem á stendur: Gegn einelti. Þetta er í fjórða sinn sem við í Oddeyrarskóla gerum þetta en starfsmenn prjónuðu húfurnar. Húfurnar eru merktar hverju barni og hver húfa er með sína liti og eru þær fjölbreytilegar í útliti eins og nemendahópurinn. Við hófum daginn með söngstund í 1. – 4. bekk og lögin sem við sungum í dag voru öll tileinkuð vináttunni. Húfurnar voru svo afhentar í lok þeirrar samverustundar.

Á forvarnardegi gegn einelti er ákveðið viðfangsefni í hverjum árgangi til að vekja sérstaka athygli á þeirri vá sem einelti er og mikilvægi þess að standa saman. Samskiptamál og mikilvægi virðingar og vináttu eru þó rædd mun oftar í skólanum og ber á góma flesta daga. Í Oddeyrarskóla er stuðst við forvarnarefni gegn einelti sem kallast „Stöndum saman“ en þar er fræðsla um hvað einelti er og leiðir til að bregðast við óæskilegri hegðun og framkomu.

Laugardaginn 9. nóvember verður hið árlega jólabingó Foreldrafélags Oddeyrarskóla haldið. Herlegheitin byrja kl 14:00 og standa til ca kl. 17:00 og vinningarnir eru stórglæsilegir.

Spjaldið kostar 500 kr. fyrir hlé en 250 kr. eftir hlé.

10. bekkur verður með kaffisölu í hléi.

Við bendum fólki á að mæta tímanlega þar sem það er takmarkaður sætafjöldi.

Enginn posi er á staðnum.

———

On Saturday the 9th of November from 2 pm to 5 pm our yearly Christmas bingo will be held at Oddeyrarskóli. Grand prizes!

The bingo card costs 500 kr. before the break and 250 kr. after.

The 10th grade will be selling coffee and waffles during the break.

We recommend you show up early as there are limited seats.

Cash only, we will not be able to take cards.

Kæru foreldrar og forráðamenn nemenda í Oddeyrarskóla

Þar sem viðtalsdagar eru nýafstaðnir langar okkur stjórnendur að heyra af ykkar upplifun af foreldraviðtali og/eða menntabúðum og svo hópspjalli á unglingastigi eftir því sem við á. Við viljum þróa okkur á þessum vettvangi og koma sem best til móts við þarfir foreldra og nýta tímann á skilvirkan hátt.

Með því að smella á meðfylgjandi tengil opnast könnun sem við biðjum ykkur um að svara.

Smellið hér til að taka könnun

Á viðtalsdegi þann 16. október var foreldrum skólans boðið að sækja fræðslu í skólanum í formi menntabúða og fræðsluerinda. Sérfræðingar innan og utan skóla tóku að sér fræðsluna og var í þetta sinn hægt að velja á milli nokkurra ólíkra erinda. Menntabúðir voru um 30 mínútur hver og gátu allir valið að mæta á eina til fjórar slíkar á milli klukkan tvö og fjögur þennan dag. Könnun var gerð á áhuga foreldra í formi skráningar í gegnum tölvupóst en allir gátu mætt óháð þeirri skráningu. Við vorum mjög ánægð með mætinguna og vonum að þeir sem komu hafi haft gagn og gaman af. Við höfum undanfarið ár verið að taka lítil skref í áttina að því að breyta fyrirkomulagi á viðtalsdögum í Oddeyrarskóla og höfum við hug á að halda áfram að þróa þetta samstarf og samtal við foreldra með það að leiðarljósi að styrkja skólasamfélagið, auka tengsl og bæta almennt skólastarf. Við þökkum foreldrum og starfsfólki fyrir daginn, við finnum fyrir miklum stuðningi og vilja allra til að þróa samstarfið áfram. 

Fimmtudaginn 3. október var fjölgreindardagur í Oddeyararskóla. Hefðbundin stundaskrá var brotin upp. Nemendum var blandað í námshópa þvert á aldur þar sem og voru hópstjórar elstu nemendur í hverjum hópi, oftast nemendur í 10. bekk. Farið var milli námsstöðva þar sem fjölbreytnin var í fyrirrúmi og stuðst við fjölgreindarkenningu Gardners. Dæmi um viðfangsefni er steinamálun, hreyfing, hugarflæði og leikir. Í frímínútum var boðið upp á skúffuköku, mjólk og ávexti í tilefni þess að nemendur náðu að safna 5000 þrumum sl. vor. Þegar þessari dagskrá var lokið var farið í íþróttasalinn. Þar fengu þeir nemendur sem hraðast hlupu í skólahlaupinu viðurkenningu. Að lokum dönsuðu allir, stórir og smáir zumba og skemmtu sér vel. Hér má sjá myndir frá deginum og hér koma myndir frá kaplakubba stöðinni.

Forritarar framtíðarinnar eru samtök sem vilja stuðla að aukinni fræðslu og áhuga meðal barna og unglinga á forritun og tækni. Nú á dögunum hlaut Oddeyrarskóli 200.000 kr. styrk frá þeim til búnaðarkaupa og þökkum við þeim kærlega fyrir. Ætlunin að nota styrkin til að kaupa forritanlegar smátölvur og ýmsan fylgibúnað tengdan þeim.

Þetta er ekki fyrsta sinn sem við hljótum styrk frá þeim en árið 2016 fengum við 20 borðtölvur sem enn nýtast okkur vel auk námskeiðs fyrir kennara í forritunarkennslu.

Upplýsingatækni verður æ veigameiri partur af námi barna með hverju árinu, og styrkir sem þessir eru ómetanlegir. Enda viljum við að börnin okkar verði fær um að nota tæknina á jákvæðan og uppbyggjandi hátt og skapa sína eigin framtíð.