Foreldrum barna sem eru að hefja nám í 1. bekk grunnskóla stendur  til boða að velja í hvaða skóla börn þeirra fara í samræmi við skólastefnu og fjölskyldustefnu Akureyrarbæjar.

Það er mikilvægt að foreldrar kynni sér starfsemi skólanna vel og hvað þeir hafa upp á að bjóða. Af því tilefni bjóða grunnskólarnir upp á „opið hús“ í febrúarmánuði og eru foreldrar hvattir til að nýta sér það. Í Oddeyrarskóla verður opið hús miðvikudaginn 17. febrúar 2016 kl. 9-11. Þá geta foreldrar kíkt í heimsókn til okkar og kynnt sér skólastarfið, allir eru velkomnir hvort sem þeir eru búnir að skrá börnin sín í skólann eða ekki.

Hér er stutt kynning á helstu áherslum okkar í Oddeyrarskóla.

Nú stendur yfir innritun í grunnskólana og foreldrar geta kynnt sér það frekar á heimasíðu skóladeildar Akureyrarbæjar.

Snjórinn getur svo sannarlega stuðlað að gleði, samveru, samvinnu, útivist og hreyfingu. Hér má sjá mynd af nokkrum hraustum nemendum Oddeyrarskóla sem nýttu hádegishléið til að búa til myndarlegar snjókúlur…sóttu svo skólastjórann til að sýna afraksturinn og fá mynd á heimasíðuna að launum 🙂 Allir sælir og glaðir!

Það eru viðburðaríkir dagarnir hjá okkur núna og ber Tengja – febrúar 2016 þess merki. Hvetjum alla til að lesa 🙂 Þessa Tengju og aðrar eldri má finna á heimasíðu skólans undir tenglinum TENGJA.

Þá er árshátíðarhelgin afstaðin og erum við öll í skýjunum yfir góðum dögum. Nemendasýningar voru á föstudag og voru svo tvær sýningar fyrir foreldra og aðra aðstandendur á laugardag.

Nemendur stóðu sig frábærlega í fjölbreyttum atriðum þar sem margir fóru út fyrir þægindarammann sinn. Undirbúningur hefur staðið yfir frá því fyrir jól, en markvissar æfingar hófust á nýju ári. Kennarar leggja alltaf mikinn metnað í góðan undirbúning svo nemendur fái sem mest út úr árshátíðarundirbúningnum og sýningunum sjálfum.

Nemendur 10. bekkjar sýna alltaf lengsta atriðið. Þetta árið sýndi 10. bekkur stutta útgáfu af Mamma Mia leikritinu og slógu í gegn. Óðinn Valsson kom til liðs við okkur með leikstjórn hjá 10. bekk sjötta árið í röð og náði hann sem fyrr fram því allra besta hjá hverjum og einum. Foreldrafélagið hefur í gegnum stutt dyggilega við aðkomu leikstjóra fyrir 10. bekk og er það afar mikils virði fyrir nemendursem fá enn meiri leiðsögn í ferlinu en ella. Einnig nutu nemendur 10. bekkjar óeigingjarns stuðnings Hrafnhildar Guðjónsdóttur umsjónarkennara og Lindu Óladóttur textílkennara. Það er einstakt þegar nemendur fá tækifæri til að láta ljós sitt skína með leik og söng og erum við sannfærð um að við eigum eftir að sjá einhverja úr þessum hópi stíga á stokk á stærra sviði þegar fram líða stundir.

Foreldrafélagið stóð að vanda fyrir mögnuðu kaffihlaðborði, en innkoma vegna þess fer í rekstur foreldrafélagsins sem gengur út á að styðja við félagsstarf nemenda og skólastarfið.

Um kvöldið hélt 10. bekkurinn árshátíðarball. Mætingin var virkilega góð og voru nemendur 10. bekkjar hinir kátustu með ballið. DJ Darri sá um tónlistina og fengum við frábært hljóðkerfi og ljóskastara hjá Hinriki hjá NEOPixel.

Á laugardag höldum við árshátíð hér í Oddeyrarskóla en á morgun, föstudag, tökum við forskot á sæluna og verða nemendasýningar árshátíðar þá en sýningar fyrir foreldra og aðra aðstandendur verða á laugardeginum ásamt glæsilegu kaffihlaðborði.

Á föstudag mæta nemendur í heimastofur sínar á venjulegum tíma, þ.e. kl. 8:10 Þá hefst undirbúningur sýninga og kl. 9:00 mæta allir á sal. Þá sýna nemendur sem verða á fyrri sýningu. Að því loknu fara allir nemendur í stofur, borða nesti og teygja úr sér. Þennan dag má koma með safa og sætabrauð til hátíðarbrigða (ath. ekki gos eða sælgæti). Eftir nesti fara allir nemendur aftur á sal og þá sýna þeir bekkir sem eru á seinni sýningu. Eftir frágang og lokaundirbúning fyrir laugardagssýningarnar er hádegismatur. Skóladegi lýkur á sama tíma og vant er á föstudögum.

Við minnum foreldra á að nú stendur yfir forsala á miðum fyrir árshátíðina. Hægt er að kaupa miða í forsölu í dag og á morgun.

Nú stendur árshátíðarundirbúningur sem hæst hér í Oddeyrarskóla og því orðið tímabært að upplýsa nánar um fyrirkomulag hennar. Allar nauðsynlegar upplýsingar eru í meðfylgjandi Árshátíðartengju.

Við óskum nemendum okkar og skólasamfélaginu öllu gleðilegs nýs árs, þökkum fyrir það gamla og vonum að nýja árið verði öllum gott og gæfuríkt.

Skólastarf hefst á ný þriðjudaginn 5. janúar, en á morgun, mánudaginn 4. janúar er starfsdagur hjá kennurum.

Hlökkum til að sjá ykkur öll á nýju ári!

Þessi vika er viðburðarík hjá okkur í Oddeyrarskóla.

Á morgun, þriðjudaginn 15. desember er haldin hæfileikakeppni í skólanum og fá þá allir áhugasamir nemendur skólans tækifæri til að stíga á stokk og sýna hvað í þeim býr.

Á miðvikudaginn skerum við laufabrauð sem verður steikt í heimilisfræðistofunni. Þá munu þær Hrafnhildur og Laufey í eldhúsinu bjóða upp á hátíðarmat í hádeginu og geta nemendur gætt sér á nýsteiktu laufabrauðinu með.

Á fimmtudaginn verða nemendur í 9. bekk með kaffihús í raungreinastofunni þar sem boðið verður upp á heitt kakó og piparkökur.

Á föstudaginn eru stofujól og litlu jól. Þá mæta nemendur til umsjónarkennara kl. 9:00 og svo dönsum við í kringum jólatréð kl. 9:30 við undirleik Ármanns Einarssonar. Hver veit nema góðir gestir líti við?

Við hlökkum til samverustundanna með nemendum Oddeyrarskóla í vikunni.

Oddeyrarskóli tekur þessa vikuna þátt í alþjóðlegu verkefni í forritun sem gengur undir nafninu The Hour of code, eða klukkustund kóðunar. Þátttakendur verkefnisins eru úr öllum heiminum, frá amk. 180 löndum. Kristín Bergþóra Jónsdóttir og Margrét Aðalgeirsdóttir halda utanum verkefnið hér í Oddeyrarskóla.

The Hour of Code er klukkustundar kynning á tölvunarfræði sem ætlað er að sýna fólki fram á að hver sem er getur lært grunnatriði forritunar. Verkefnið er talið henta fólki á aldrinum 4-104 ára 🙂

Nemendur á miðstigi Oddeyrarskóla riðu á vaðið í morgun og fór verkefnið afskaplega vel af stað. Öllum nemendum skólans verður gert kleift að taka þátt í verkefninu í þessari viku.

Hér voru steiktar lummur í morgunsárið

Frábærir krakkar í Oddeyrarskóla!

Í dag héldum við upp á fullveldisdaginn. Nemendur mættu spariklæddir í tilefni dagsins. Haldin var samkoma á sal þar sem við fengum að heyra fróðleiksmola Þórarins um fullveldisdaginn, fullveldisárið 1918 og íslenska fánann. Síðan sungum við nokkur lög og loks fengu allir að gæða sér á nýsteiktum lummum með mjólk.

Fréttamen RÚV litu við og má sjá fréttina á 20. mínútu hér: http://ruv.is/sarpurinn/ruv/frettir/20151201

Ástæða þess að nemendur veifa rúmenska fánanum á myndinni hér til hliðar er sú að við erum með rúmenska gesti í skólanum þessa viku. Þeir héldu í dag upp á þjóðhátíðardaginn sinn og mættu af því tilefni í þjóðbúningum og gáfu nemendum skólans rúmenska fánann. Það var því tvöfalt tilefni til að fagna.