Þriðjudaginn 24. mars fóru nemendur Oddeyrarskóla í Hlíðarfjall. Nemendur fóru ýmist á skíði, bretti eða sleða. Á myndasíðu skólans má sjá myndir sem Þórarinn Torfason tók þennan dag.

Samþættingarverkefni í 3. og 4. bekk

Nemendur í 3. og 4. bekk unnu saman að stórskemmtilegu samþættingarverkefni í Byrjendalæsi, samfélagsgreinum, myndmennt, textílmennt og upplýsingamennt. Grunnbókin sem við unnum út frá heitir Gummi fer í fjallgöngu eftir Dagbjörtu Ásgeirsdóttur. Einnig unnum við með Komdu og skoðaðu fjöllin, kortabækur og upplýsingar af netinu.

Markmiðin með verkefninu voru að:

• auka samvinnu árganga í þriðja og fjórða bekk
• auka lestrarfærni nemanda
• allir fengju námsefni við hæfi
• bæta ritun nemenda
• hvetja til sjálfstæðra vinnubragða og auka skapandi starf
• auka leshraða, lesskilning og lestrargleði

Nemendur útbjuggu sér verkefnamöppur sem þeir söfnuðu verkefnunum sínum í. Hver hópur fékk sérstakt blað sem nemendur merktu inn á þegar þeir luku við hvert verkefni en það hjálpaði þeim að halda utan um námsframvindu þeirra. Mikil áhersla var á skapandi vinnu. Nemendur útbjuggu dúskafjall og teiknuðu mynd af fjalli sem þeir notuðu sem fyrirmynd til að þæfa listaverk eftir.

Það er skemmst frá því að segja að verkefnið lukkaðist virkilega vel. Nemendur voru áhugasamir og mikil námsgleði réði ríkjum.

Fleiri myndir frá verkefninu má sjá á myndasíðu skólans.

Eftirfarandi upplýsingar hafa farið heim í tölvupósti til foreldra/forráðamanna varðandi ferð nemenda í Hlíðarfjall 24. mars.

______________________________________

Oddeyrarskóli 20. mars 2015
Ágætu foreldrar/ forráðamenn

Þriðjudaginn 24. mars er nemendum í Oddeyrarskóla boðið í Hlíðarfjall. Einhverjir nemendur gætu komið örlítið fyrr heim úr skólanum þennan dag. Valgreinar á unglingastigi verða kenndar óbreyttar eftir hádegi og þarf að mæta í þær nema nemendur hafi leyfi til að vera lengur í fjallinu, þá fá þeir leyfi í valgreininni. Nemendur sem skráðir eru í mat fá að borða um leið og heim er komið.
Nemendur í 1. – 3. bekk sem eru sjálfbjarga á skíðasvæðinu geta komið með eigin skíðabúnað. Ekki verður hægt að lána þeim búnað, en þeir geta komið með sleða eða þotur. Nemendur í 4. – 10. bekk sem ekki eiga búnað geta fengið hann lánaðan í Hlíðarfjalli sér að kostnaðarlausu. Ekki er hægt að skipta um búnað þegar búið er að velja.
Ef nemendur í 5. – 10. bekk ætla að verða eftir í Hlíðarfjalli verða þeir að koma með samþykki frá foreldrum sínum. Fylla má í neðsta hluta þessa blaðs, skrifa miða eða senda tölvupóst til umsjónarkennara til að staðfesta að barn megi vera lengur í fjallinu.
Að lokinni skipulagðri dagskrá eru nemendur á eigin vegum. Þeir nemendur sem ætla að vera lengur en eiga ekki árskort geta fengið lánað rafrænt kort sem þeir verða að sækja milli kl. 12.00- 12.30. Þeim kortum þarf að skila í lok dags og ef þeim er ekki skilað þarf að greiða fyrir kortin eftir á. Þeir nemendur sem hafa búnað að láni geta haft hann allan daginn.
Þó margt starfsfólk fari með og verði nemendum til halds og trausts í fjallinu er áríðandi að foreldrar brýni fyrir börnum sínum að þau gæti að sér hvar sem þau eru og reyni ekki að fara í lyftur og skíðabrautir sem þau ráða ekki við. Sérstaklega beinum við þessum tilmælum til þeirra sem eru óvanir að vera á skíðum eða nota lyftur.

Munið eftir góðu nesti (þennan dag má vera með drykki í fernum og frjálslegt brauð s.s. kringlur eða kleinur), hjálmi og góða skapinu. Mikilvægt er að vera klæddur til útivistar, merkja vel föt og allan búnað. Þeir sem ekki eiga hjálm fá hann lánaðan að kostnaðarlausu.
Foreldrum er velkomið að koma með og fylgjast með nemendum þennan dag. Athugið að hjálmurinn skiptir höfuðmáli hvort sem barnið er á bretti, sleða eða skíðum.
Sólin er farin að hækka á lofti og endurkastið frá snjónum er mikið því er gott að bera á sig sólvörn.
Mætingar:
8. – 10. bekkur. Mæting í skóla kl. 08:00. Rútur í Hlíðarfjall kl. 08.15 og til baka kl.12:45
5. – 7. bekkur. Mæting í skóla kl. 08:00. Rútur í Hlíðarfjall kl. 08:40 og til baka kl.12:45
1. – 4. bekkur. Mæting í skóla kl. 08:00. Rútur í Hlíðarfjall kl. 09:00 og til baka kl.12:00
Með von um góða skemmtun í Hlíðarfjalli
Starfsfólk Oddeyrarskóla
—————————————————————————————————————————————-

Ég undirrituð/aður staðfesti að
Nafn nemanda ________________________________________________ bekkur _______
má vera lengur í Hlíðarfjalli. Ég geri mér grein fyrir að barnið er á mína ábyrgð eftir að
skipulagðri dagskrá Oddeyrarskóla lýkur í fjallinu (berist til umsjónarkennara).
Nafn foreldris/forráðamanns: __________________________________________________

Í dag hafa Samtaka sem eru samtök foreldrafélaga á Akureyri afhent nemendum 1.-6. bekkjar ísskápasegla þar sem reglur um útivistartíma barna koma fram.  Sjá viðhengi frá Samtaka.

Afhending segla

Í dag var mesti sólmyrkvi sem orðið hefur á Íslandi í 61 ár. Af því tilefni fengum við send sólmyrkvagleraugu fyrir alla nemendur og starfsmenn skólans. Þetta gerði okkur kleift að geta notið myrkvans á öruggan hátt. Þetta var einstök upplifun og á meðfylgjandi myndum má sjá nokkra nemendur og starfsfólk skólans fylgjast frannt með sólmyrkvanum. Fleiri myndir eru væntalegar á myndasíðu skólans.

Í gær tóku tóku þær Björg Elva og Lilja Katrín þátt í Stóru upplestrarkeppninni. Þær stóðu sig báðar með mikilli prýði og lenti Björg Elva í 3. sæti. Innilega til hamingju með það.

Í skólahreystikeppninni varð lið Oddeyrarskóla í 5. sæti , stóðu sig mjög vel.

Eftir hádegi á morgun, miðvikudag tekur Oddeyrarskóli þátt í skólahreysti í íþróttahöllinni. Nemendur í 5.-10. bekk munu fjölmenna í íþróttahöllina um hádegið og ljúka skóladeginum þar. Erfitt er að áætla um hvenær keppni lýkur. Litur Oddeyrarskóla er appelsínugulur og við hvetjum alla til að mæta í þeim lit ef þeir geta.

Fulltrúar okkar úr 7. bekk munu síðan taka þátt í stóru upplestrarkeppninni kl. 17 á morgun. Keppnin er að vanda haldin í Kvosinni í Menntaskólanum á Akureyri.

Í þessari viku byrjar 100 miða leikurinn hjá okkur.
Tilgangur leiksins er að hvetja nemendur til að fara eftir SMT skólareglum. Nemendur leggja sig fram um að sýna fyrirmyndarhegðuní skólanum og allir nemendur geta verið með í leiknum. Leikurinn gengur út að það að 10 nemendur á dag fá sérmerkta umbunarmiða, brosstjörnur í þá 10 daga sem leikurinn stendur yfir, eða samtals 100 miða. Þegar nemendur fá miða fara þeir með hann til ritara, segja fyrir hvað þeir fengu miðann og draga hjá honum númer frá 1 og upp í 100. Númerið sitt líma þeir á þar til gert spjald. Þegar búið er að fylla spjaldið með 100 miðum þá verður gert ljóst hvaða röð vann. Því standa 10 nemendur uppi sem vinningshafar. Þessir nemendur fá óvænta umbun.

Úrslit verða gerð ljós þriðjudaginn 17. mars og óvænta umbunin verður miðvikudaginn 18. mars.

Bestu kveðjur
SMT stýrihópurinn

Síðastliðinn þriðjudag heimsótti Björn Björnsson frá Rauða krossinum alla nemendur skólans og kynnti þeim skyndihjálp. Þetta boð kom í tilefni af því að Rauði krossinn á Íslandi fagnar 90 ára afmæli félagsins um þessar mundir. Skyndihjálp er eitt elsta og mikilvægasta verkefni Rauða krossins.

Á kynningunni fengu nemendur fræðslu um það hvernig  beita megi endurlífgun, losa aðskotahluti úr öndunarvegi, stöðva blæðingu og kæla bruna.

Nemendur fengu einnig kynningu á nýju skyndihjálpar appi sem þeir geta hlaðið í símana sína. Appið getur hjálpað fólki þegar það lendir í aðstæðum þar sem það þarf að beita skyndihjálp.

Einnig fengu nemendur að heyra skyndihjálparlagið, en það mað má nálgast hér.

Þessa dagana stendur yfir innritun í grunnskóla bæjarins fyrir næsta vetur og er innritunarfrestur til 27. febrúar nk.

Innritunin er fyrst og fremst auglýst meðal foreldra barna sem fædd eru árið 2009 (verðandi 1. bekkur), en rétt er að vekja einnig athygli á því að ef foreldrar óska eftir að skipta um skóla fyrir börn sín þarf að sækja um í nýjum skóla fyrir þennan tíma. Vegna skipulagningar skólanna fyrir næsta skólaár er mjög mikilvægt að innritunum ljúki tímanlega.

Skólarnir hafa opin hús á mánudag og þriðjudag í næstu viku þar sem kostur gefst á að skoða og kynna sér starfið, tímasetningar má nálgast á vefslóðinni hér fyrir neðan. Af gefnu tilefni skal tekið fram að ekki þarf að innrita nemendur aftur í sama skóla og þeir ganga í nú þegar, aðeins ef óskað er eftir að þeir skipti um skóla.

Innritunarreglur, tímasetningar kynninga/opinna húsa, eyðublöð og rafrænt form fyrir umsóknir um grunnskóla má nálgast á heimasíðu skóladeildar.