Í ljósi nýjustu tilmæla Almannavarna þarf að endurskoða skipulag skólastarfs frá og með þriðjudeginum 24. mars. Sóttvarnir eru forgangsmál hjá öllum í samfélaginu og eiga þær við allsstaðar og alltaf. Hólfun skóla verður enn markvissari en verið hefur og tekið verður fyrir allan ónauðsynlegan samgang á milli þeirra hvort sem um nemendur eða starfsfólk er að ræða.

Nú er okkur gert að fækka í hópum eldri nemenda og skólar munu því vinna samkvæmt því sem hér segir:

• 1.-4. bekkur verður áfram fram til hádegis í skólanum skv. sama skipulagi og verið hefur.
• 5.-7. bekk verður skipt í tvo hópa og mæta nemendur annan hvern dag samkvæmt nánara skipulagi sem ykkur berst frá hverjum skóla.
• 8.-10. bekkur verður alfarið í heima- og sjálfsnámi með aðstoð kennara

Eindregin tilmæli eru um að þeir foreldrar sem eru heima yfir daginn og geta haft börn sín heima geri það. Það styrkir enn frekar sóttvarnir og auðveldar starfsfólki að halda uppi reglubundnu starfi.

Bestu þakkir fyrir ríkan skilning á stöðunni og það er gott að finna hvernig samtakamátturinn fleytir okkur áfram við aðstæður sem þessar.

Karl Frímannsson
sviðsstjóri fræðslusviðs Akureyrarbæjar

Skólastarfið hefur gengið vel í Oddeyrarskóla þrátt fyrir takmarkanir í ljósi breyttra aðstæðna í samfélaginu og gerum við okkar besta til að  mæta nemendum með fjölbreyttum leiðum í námi. 

Allir nemendur skólans eru í námshópum sem ekki blandast á skólatíma. Í hverjum hópi eru að hámarki 20 nemendur. Nemendur 1. – 7. bekkjar fá útiveru á hverjum degi og lögð er áhersla á að hópar blandist ekki þar. Skóli byrjar 8:10 hjá þessum nemendum en skólinn opnar 7:50 og nemendur eru að koma inn á mismunandi tíma. Miðstigið hættir milli 12:00 og 12:30 en yngsta stigið kl. 13:00. Starfsmenn mæta fyrr en venjulega og fara beint inn í kennslustofur. Nemendur á unglingastigi mæta alla daga í skólann klukkan 12:45 og eru til 15:30 en stunda annað nám að morgni. Umsjónarkennari á fund með sínum nemendum á google meet klukkan 10 alla dag og þá eru nemendur klæddir og komnir á ról og tilbúnir að fara út í hreyfingu dagsins sem þeir gera grein fyrir. 

Aðstæður sem þessar reyna á og það sem er einna mest krefjandi er að vera á sama svæði mest allan skóladaginn með sama nemendahóp. Það er aðdáunarvert hvað allir standa sig vel í þessu, bæði nemendur, kennarar og aðrir starfsmenn og verkefnin eru fjölbreytt þó ekki sé farið milli stofa. 

Nemendur í 1. – 7. bekk fá mat í hádeginu. Yngsta stigið fær mat inn í kennslustofur en matráður fer með hitaborð á staðinn og skólaliðar á svæðinu aðstoða við að útdeila mat og taka saman mataráhöld og afganga. Miðstigið fer í matsalinn, einn hópur í einu með ákveðnu millibili og þar fá nemendur að borða áður en þeir fara heim. 

Frístundin er aðeins opin fyrir 1. og 2. bekk sem eru á aðskildum svæðum. Nemendur í 3. og 4. bekk eiga kost á að vera í Frístund til klukkan 14:00

Þetta fyrirkomulag getur breyst með litlum fyrirvara og því er nauðsynlegt að fylgjast vel með. Allar upplýsingar til foreldra koma með tölvupósti og verða birtar á heimasíðu. Við vekjum athygli á því að ef aðgerðir Almannavarna til að minnka líkur á smiti verða hertar og skólinn þarf að skerða enn frekar þjónustu eða loka þurfa foreldrar á forgangslista að sækja sérstaklega um fyrir sín börn í 1. og 2. bekk en vinnuveitendur senda upplýsingar um það ferli. Athugið þó að það er neyðarráðstöfun og aðeins gripið til í brýnustu nauðsyn.

Við þökkum foreldrum og forráðamönnum fyrir ómetanlegan skilning og stuðning sem við höfum fundið fyrir undarfarna daga.

Við skólann starfar öflugt foreldrafélag sem styður við skólann á margvíslegan hátt. Á dögunum fékk skólinn nýjan prentara að gjöf en hægt er að teikna með honum og skera út í efni og filmu. Foreldrafélagið gefur einnig pressu sem notuð er til að þrykkja á tau, t.d. myndir á boli eða töskur sem búið er að prenta í nýja prentaranum.

Foreldrafélagið hefur einnig gefið mannbrodda til notkunar á skólatíma fyrir nemendur og nú var verið að bæta við fleiri mannbroddum. Yngri kynslóðin hefur verið dugleg að nota mannbroddana í hálkunni en þeir eru til afnota í frímínútum óski nemendur eftir því.

Þá má geta þess að félagið hefur gefið bókasafni skólans ákveðna peningaupphæð til að bæta við bókakost skólans.

Það er ómetanlegt fyrir skólasamfélagið að hafa þennan bakjarl til að styðja við og augða starfið okkar og færum við foreldrafélaginu okkar bestu þakkir.

Eins og komið hefur fram í fjölmiðlum í dag hefur heilbrigðisráðherra ákveðið að virkja heimildir sóttvarnalaga sem fela m.a. í sér að skólahald verður takmarkað tímabundið. Nánari útfærslur verða unnar samkvæmt tilmælum stjórnvalda.

Í ljósi þessa hefur verið ákveðið að mánudaginn 16. mars verði starfsdagur í leik- og grunnskólum Akureyrarbæjar svo stjórnendur og starfólk geti skipulagt skólastarfið sem best á þessu tímabili sem takmörkunin nær til.

Foreldrar leik- og grunnskólabarna eru beðnir að fylgjast vel með upplýsingum sem birtast munu um helgina og á mánudaginn m.a. á heimasíðu Akureyrarbæjar og heimasíðum grunn- og leikskóla.

Fulltrúar skólans í Stóru upplestrarkeppninni stóðu sig með stakri prýði á lokahátíðinni síðastliðinn miðvikudag þó við næðum ekki verðlaunasæti. Það gerði hins vegar keppnisliðið okkar í Skólahreysti sem náði 3. sæti eftir undraverðan hraða í hraðabrautinni. Við getum verið stolt af þessu unga fólki og höldum áfram að hvetja nemendur okkar til dáða í leik og starfi.

Akureyrarbær býður grunn- og framhaldsskólanemum á Akureyri frítt í sund og á skíði.

Miðvikudaginn 26. febrúar, fimmtudaginn 27. febrúar og föstudaginn 28. febrúar geta grunn- og framhaldsskólanemar á Akureyri farið í skíðalyfturnar í Hlíðarfjalli og í sundlaugar Akureyrar án endurgjalds.

Grunnskólanemendur gefa upp kennitölu og nafn skóla í afgreiðslu og framhaldsskólanemar VMA og MA framvísa nemendaskírteinum.

Athugið að krakkarnir þurfa að eiga rafrænt kort eða kaupa slíkt á 1.000 kr. í skíðalyfturnar, kortin fást í afgreiðslu Hlíðarfjalls.

Í næstu viku, 24. til 28. febrúar verður enginn hefðbundinn skóladagur. Þessa daga eru skipulagsdagur, viðtalsdagur og vetrarfrí. Nemendur mæta bara í foreldraviðtal með sínum foreldrum eða forráðamönnum á mánudag eða þriðjudag en foreldrar 1. – 7. b. bóka viðtalstíma á mentor.is og foreldrar unglinga bóka viðtöl eftir upplýsingum frá umsjónarkennurum en þeir hitta kennara á fundi í hádeginu fösudaginn 21. febrúar.

Frístund er opin frá 7:45-16:15 á mánudag og þriðjudag, en lokuð á miðvikudag, öskudag og aðeins opin frá kl. 13:00-16:15 í vetrarfríinu á fimmtudag og föstudag.

Í gær voru valdir fulltrúar nemenda í 7. bekk sem taka þátt í stóru upplestrarkeppninni sem haldin verður í sal Menntaskólans á Akureyri þann 4. mars nk. Hér má sjá myndir af þeim sem lesa upp fyrir hönd Oddeyrarskóla ásamt dómnefndinni en þessir þrír nemendur munu æfa fram að keppni og tveir af þeim taka síðan þátt á lokahátíðinni.

Fimmtudaginn 13. febrúar var útivistardagur í Hlíðarfjalli. Veðrið var fallegt og færið eins og best verður á kosið. Nemendur og starfsfólk nutu útiverunnar en frostið var 12 gráður þennan dag og sumum varð heldur kalt. Flestir voru þó vel búnir og áttu dásamlegan dag.

Hér má sjá nokkrar myndir frá deginum.