Í dag, fimmtudaginn 21. nóvember standa nemendur í 10. bekk fyrir Bingói í íþróttasal skólans.

Bingóið hefst kl. 18:00. Spjaldið kostar 500 krónur og eru vinningar ekki af verri endanum.

Nemendur munu selja pylsur og gos á 300 krónur í hléinu.

Allur ágóði rennur í ferðasjóð 10. bekkjar en stefnt er að því að fara í ógleymanlega útskriftarferð í skólalok 🙂

Nemendur 2. bekkjar í gryfjunni í fimleikahúsi Giljaskóla

Í gær fór 2. bekkur með kennurum í heimsókn í fimleikahúsið við Giljaskóla.

Fimleikafélagið bauð nemendum 2. bekkjar í þessa heimsókn til að kynnast húsinu og aðstöðunni þar. Heimsóknin var afar vel heppnuð og börnin til fyrirmyndar.

Hægt er að skoða myndir á myndasíðu skólans.

Í dag fengu nemendur í 1. og 2. bekk að horfa á leiksýninguna Emmu umferðartröll. Leikarar voru þrír og byggist sýningin á fræðslu á umferðarreglum.

Leiksýningin var vel heppnuð og nemendur voru sjálfum sér og skólanum til sóma. Þeir fengu endurskinsmerki að gjöf og var um leið bent á heimasíðu sýningarinnar emmaumferdartoll.is sem hefur m.a. að geyma myndir af persónunum sem hægt er að prenta úr og lita.

Myndir frá sýningunni eru á myndasíðu skólans.

Dagur íslenskrar tungu var haldinn hátíðlegur á unglingastiginu í dag.

Nemendur í 8. bekk fóru í Brekkuskóla og nemendur í 9. bekk fóru í Síðuskóla, þar sem þeir héldu ræður um hin ýmsu málefni.  Það er skemmst frá því að segja að kennarar voru hæstánægðir með sitt fólk. Það stóð sig með mikilli prýði.

Nemendur í 10. bekk fóru upp í háskóla þar sem haldin var hátíðardagskrá í boði Íslenskrar málnefndar og Mjólkursamsölunnar. Ari Eldjárn var kynnir auk þess sem hann skemmti gestum á sinn einstaka hátt.  Einnig fluttu menntamálaráðherra og fulltrúi mjólkursamsölunnar ávarp. Framlag nemenda úr 10. bekk grunnskólanna á Akureyri var mjög fjölbreytt og skemmtilegt.  Nemendur úr 10. bekk Oddeyrarskóla voru sér og sínum til mikils sóma.

Í dag, föstdaginn 15. nóvember fengum við góða gesti hingað í skólann.

Menntamálaráðherra, Illugi Gunnarsson og tveir starfsmenn Menntamálaráðuneytisins komu til okkar ásamt fræðslustjóra og formanni skólanefndar Akureyrarbæjar og kynntu sér íslenskukennslu í 1.-4. bekk. Þau fengu kynningu á því hvernig unnið er í byrjendalæsi í Oddeyrarskóla og einnig sáu þau nemendur 4. bekkjar vinna íslenskuverkefni í anda aðferðarinnar „leikur að læra“. Að loknum heimsóknum í bekk spjallaði Illugi við nokkra kennara og stjórnendur skólans.

Einnig heimsótti rithöfundurinn Dagbjört Ásgeirsdóttir nemendur í 1. – 4. bekk og las úr bók sinni Gummi og dvergurinn úrilli fyrir nemendur og höfðu nemendur virkilega gaman af.

Myndir frá heimsóknunum má sjá á myndasíðu skólans, tengill hér til vinstri.

Undanfarnar þrjár vikur hafa nemendur í 7. bekk unnið að ferðaskrifstofuverkefni í samfélagsfræði. Verkefnið var unnið  í samvinnu við Særúnu kennaranema. Nemendur völdu sér land í Evrópu og unnu verkefni í tengslum við það. Lokaafurðin var ferðaskrifstofusýning þar sem foreldrum var boðið að koma og sjá afraksturinn. Nemendur buðu upp á ýmsar kræsingar sem tengdust löndunum sem þeir fjölluðu um.

Í boði voru draumaástir til Frakklands, æðiferð til Eistlands, skemmtiferð til Danmerkur, matarferð til Ítalíu og brúðkaupsferð til Grikklands. Fleiri myndir frá sýningunni má sjá á myndasíðu skólans (hlekkur hér til vinstri).

Ný tengja er komin í loftið en í henni má sjá ýmsar fréttir úr skólalífinu. Tengju nóvembermánaðar og eldri Tengjur má finna undir tenglinum Tengja.

Minnum nemendur og foreldra á að fylla út frammistöðumat í Mentor fyrir mánudaginn 18. nóvember. Viðtalsdagar verða miðvikudaginn 20. nóvember og fimmtudaginn 21. nóvember.

Nemendur í 6. bekk verða með vöfflur og kaffi/djús til sölu í matsal skólans en ágóðinn fer í Reykjaferð á næsta skólaári.

Ný aðalnámskrá boðar talsverðar breytingar og uppstokkun á starfsháttum og inntaki náms á Íslandi. Af þeim sökum standa samtökin Heimili og skóli fyrir kynningarfundum víðs vegar um landið árið 2013 þar sem foreldrum er boðið að koma og fræðast um nýja námskrá.

Á kynningunum verður farið í eftirfarandi atriði:

• Grunnþættir menntunar
• Ný og fjölbreytt vinnubrögð
• Hæfni og lykilhæfni
• Nýtt námsmat
• Skörun hæfniþrepa

Fundurinn verður haldinn þriðjudaginn 5. nóvember kl. 18 á sal Brekkuskóla á Akureyri.

Samhliða fundunum útbúum við fjölbreytt fræðsluefni sem við birtum á vef samtakanna (www.heimiliogskoli.is/adalnamskra) og bendum á annað gagnlegt efni.

Ljósmyndirnar sem teknar voru af nemendum í byrjun október eru komnar í skólann og tilbúnar til afhendingar.

Verðið er 4500 kr. fyrir hópmynd af bekknum í str. 20x25cm og 3 einstaklingsmyndir (1stk. 13×18 og 2 stk. 10×15 cm). Ef foreldrar eiga fleiri en tvö börn í skólanum greiða þeir aðeins fyrir tvö börn, þ.e. 9000 kr.

Myndirnar fást afhentar hjá Kristínu ritara skólans til 8. nóvember gegn greiðslu með peningum eða með því að leggja inn á reikn. 545-14-404652 kt. 190179-3549 og framvísa kvittun þegar myndir eru sóttar. Einnig má koma í skólann og skoða myndirnar áður en ákvörðun er tekin, en því miður verður ekki hægt að skoða myndirnar á netinu.

Allar nánari upplýsingar fást hjá Írisi ljósmyndara með því að senda tölvupóst á  iris@infantia.eu