Fjölskyldudeild Akureyrarbæjar býður börnum með ADHD að taka þátt í námskeiði til að efla færni á ýmsum sviðum. Námskeiðið er fyrir börn fædd árið 2004 og 2005 og eru 6 börn í hverjum hóp. Áhersla er lögð á að auka færni barna í félagslegum samskiptum, skapstillingu, sjálfsstjórn og að bæta athyglisgetu þeirra. Hópurinn hittist tvisvar í viku 2 tíma í senn, í 5 vikur (10 skipti alls) með tveimur þjálfurum. Eftirfarandi þættir eru teknir fyrir með börnunum í litlum hópum:

Tilfinninga- og reiðistjórnun: Börnunum eru kenndar ýmsar aðferðir við að stilla tilfinningar sínar þegar það er ekki viðeigandi að sýna þær, m.a. reiðistjórnun í samskiptum. Þar að auki læra þau um tilfinningar, svipbrigði og áhrif aðstæðna á líðan þeirra og annarra. Sú þekking mun nýtast þeim í samskiptum við aðra.

Félagsfærni: Farið er yfir atriði eins og hvernig og hvenær er viðeigandi að hefja samskipti við aðra, samskiptareglur og aukna færni í að setja sig í spor annarra.

Sjálfsstjórn: Kenndar eru aðferðir sem nýtast við að hamla hvatvísi og auka stjórn á eigin hegðun.

Þrautalausnir: Farið er yfir aðferðir við að leysa ýmis vandamál sem upp koma á skynsamlegan hátt. Í því felst að finna valmöguleika í stöðunni, hugsa um mögulega útkomu hvers valmöguleika og velja bestu lausnina til að ná ákveðnu markmiði.

Athyglisþjálfun: Í hverjum tíma eyðir hvert barn u.þ.b. 20 mínútum í tölvuforriti sem er ætlað að auka athyglisgetu, vinnsluminni og vinnsluhraða.

Þjálfarar á námskeiðinu verða Helga Vilhjálmsdóttir og Guðný Dóra Einarsdóttir sálfræðingar við Sérfræðiþjónustu skóla á Fjölskyldudeild.

Námskeiðið verður 10. mars–9. apríl, 2014 á mánudögum og miðvikudögum kl. 16:15-18:15, 10 skipti alls.

Til að sækja um Snillinganámskeiðið vinsamlegast sendið umsókn á þar til gerðu umsóknarblaði og sendið á Fjölskyldudeild fyrir 24. febrúar. Umsóknarblað geta forráðamenn fengið hjá skóla eða á Fjölskyldudeild. Nánari upplýsingar hjá Helgu Vilhjálmsdóttur og Guðnýju Dóru Einarsdóttur í síma 460-1420 eða  með tölvupósti á helgav@akureyri.is eða gudnydora@akureyri.is

Þátttökugjald: kr. 7.000 fyrir námskeiðið

umsoknareydublad_snillinga

Nú ætlar nemendaráð Oddeyrarskóla að bjóða aftur upp á hettupeysur eins og seldar voru fyrir nemendur og starfsfólk fyrir áramót. Peysurnar munu kosta 4.500.- og verður hægt að máta og borga fyrir þær í næstu viku, þriðjudaginn 18. og fimmtudaginn 20. febr. kl. 16-18  í skólanum í stofu 101 (Stapi). Gengið inn að vestan hjá íþróttahúsinu. Það verða eingöngu pantaðar greiddar peysur (ekki er tekið við greiðslukortum).  Peysurnar verða í barnastærðum frá 7-13 ára og svo fullorðinsstærðum S, M, L, XL, og 2XL. Fimm litir verða í boði í hvorum stærðarflokki.

Nánar um liti og stærðir í meðf. viðhengi:

Hettupeysur

Í dag heimsóttu nemendur í 8. og 9. bekk vini sína í 1. og 2. bekk þar sem hin ýmsu spil voru spiluð. Á myndasíðu má sjá fleiri myndir.

Í dag var útivistardagur hjá okkur í Oddeyrarskóla. Við fórum öll upp í Hlíðarfjall ýmist á gönguskíði, svigskíði eða bretti og virtust allir ánægðir með daginn.

Þeir nemendur sem ekki eiga skíða- eða brettabúnað gátu fengið hann lánaðan í Hlíðarfjalli og var undirbúningur starfsmanna Hlíðarfjalls til fyrirmyndar eins og alltaf. Því gekk ótrúlega vel að koma öllum í skó og skíði til að fara að renna sér í brekkunum. Veðrið var gott þrátt fyrir örlitla snjókomu en færið var frábært. Brekkurnar voru vel troðnar svo allir gátu sýnt sína bestu takta 🙂

Nemendur 3. og 4. bekkjar fengu skíðakennslu í boði Skíðafélags Akureyrar og Hlíðarfjalls fyrr í vetur og mátti sjá árangurinn af þeirri kennslu í dag.

Við þökkum starfsmönnum Hlíðarfjalls og Skóladeild Akureyrar kærlega fyrir frábæran dag!

Myndir eru komnar á myndasíðu skólans.

Í dag 7. febrúar er Dagur stærðfræðinnar. Markmið með deginum er tvíþætt; að vekja nemendur og sem flesta aðra til umhugsunar um stærðfræði og hlutverk hennar í samfélaginu og einnig að fá nemendur til að koma auga á möguleika stærðfræðinnar og sjái hana í víðara samhengi. Af þessu tilefni tóku allir á yngsta stiginu þátt í skemmtilegum stærðfræðiverkefnum í ýmsum myndum, fóru m.a. í bingó, Yatzy, spiluðu alls kyns spil og fleira. Myndir frá deginum má sjá á myndasíðu skólans.

Skólahreysti Oddeyrarskóla var haldin í dag í íþróttasal skólans. Keppnin tókst afar vel og var mikið fjör. Þátttakendur voru nemendur á unglingastigi. Hjá stelpunum voru það Ágústa Jenný 8.b. sem var hlutskörpust í hraðabrautinni og Birta 8.b. í armbeygjum og hreystigreip. Þær munu taka þátt í æfingum fyrir Skólahreysti ásamt varamanni sem verður Tara 10.b.

Hjá strákunum voru valdir til æfinga 4 strákar sem voru mjög jafnir, þeir  Don og Egill í 9.b. og Alexander Ívan í 10.b. í hraðabraut. Alexander Ívan og Hrannar 10.b. voru hlutskarpastir í dýfingum/upphýfingum.

Síðar verður ákveðið hverjir af þessum nemendum munu keppa fyrir hönd Oddeyrarskóla í lokakeppninni sem haldin verður í mars. Til hamingju krakkar!

Myndir eru væntanlegar á myndasíðu skólans.

Í febrúarmánuði fer fram innritun nemenda sem hefja nám í 1. bekk í grunnskólum Akureyrar haustið 2014.

 Á heimasíðu skóladeildar, undir hnappnum Skólaval – grunnskólar, má finna upplýsingar um grunnskólana á Akureyri, sértæka þjónustu, viðmiðunarreglur um inntöku, rafræn umsóknareyðublöð og fleira. Hver skóli er með opið hús fyrir foreldra barna sem hefja nám í grunnskóla haustið 2014 og eru foreldrar hvattir til að notfæra sér það tækifæri.

 Kynning/opið hús, verður í grunnskólum Akureyrar í febrúar frá kl. 9:00-11.00:

Glerárskóli og Lundarskóli        11. febrúar
Giljaskóli og Naustaskóli           12. febrúar
Oddeyrarskóli og Síðuskóli       13. febrúar
Brekkuskóli                                      14. febrúar

Um síðustu helgi var haldin árshátíð hér í Oddeyrarskóla. Alllir bekkir sýndu atriði og stóðu þeir sig frábærlega.

Sýnd voru fjölbreytt atriði, m.a. úr ýmsum sögum og ævintýrum. Góðlátlegt grín var gert að starfsmönnum skólans, nemendur sýndu listir sínar í íþróttum, stiklað var á stóru um vinsælustu hljómsveitir sögunnar og síðast en ekki síst var sýnd uppfærsla nemenda í 10. bekk á atriðum úr Dýrunum í Hálsaskógi. Foreldrafélag skólans styður einstaklega vel við árshátíðina m.a. með því að útvega leikstjóra fyrir 10. bekk og síðan stendur félagið fyrir stórglæsilegu kaffihlaðborði fyrir alla milli sýninga.

Dagurinn var ógleymanlegur og til að hjálpa okkur að halda í minningarnar tók Þórarinn Torfason skólasafnskennari og frístundaljósmyndari myndir af sýningunni og eru  þær væntanlegar á myndasíðu skólans.

Í morgun kom Þorgrímur Þráinsson rithöfundur í heimsókn til nemenda í 10. bekk með fyrirlestur sem hann kallar Láttu drauminn rætast.  Fyrirlesturinn er hvatning til  nemenda um að bera ábyrgð á eigin lífi, sýna samkennd, bera virðingu fyrir öllum og hafa hugrekki til að fylgja hjartanu. Á morgun miðvikudag 22.jan. bjóða foreldrafélög skólanna í bænum, foreldrum nemenda í 10.bekk á fund með Þorgrími. Fundurinn verður í sal Brekkuskóla kl. 20:00.

Meðfylgjandi eru myndir frá heimsókninni í morgun.

Tengja – árshátíð_janúar 2014