Fimmtudagskvöldið 16. janúar var leiklistar- og tónlistarhópi af unglingastigi  Oddeyrarskóla boðið til generalprufu á uppfærslu Leikfélags Akureyrar á leikverki Davíðs Stefánssonar, Gullna hliðinu. Jafnframt var hópnum boðið að eiga samtal við leikstjóra og leikmyndahönnuð að sýningu lokinni.

Vel var mætt og nutu nemendur sýningarinnar sem er í alla staði alveg frábær. Þótt texti verksins sé þungur þá er honum gerð afar góð skil og þannig að allar kynslóðir skilja hann vel. Nemendur voru sammála um leikurinn hafi verið tilþrifamikill auk þess sem leikmynd er frábærlega hönnuð.

Kennari og nemendur sem þáðu þetta boð leikhússins eru sammála um að þessi sýning henti fólki á öllum aldri og væri þannig frábær fjölskyldustund.  Þarna gefst líka tækifæri til að heiðra minningu Akureyrarskáldsins Davíðs Stefánssonar og halda í þann arf sem hann færði komandi kynslóðum.

Við þökkum leikfélagi Akureyrar innilega fyrir gott boð 🙂

Nú er Janúartengjan okkar komin í loftið. Tengjan er fréttabréf skólans og henni er ætlað að stuðla að auknu upplýsingaflæði milli heimila og skóla.

Tengjuna og eldri Tengjur má finna undir flipanum Tengja hér fyrir ofan.

Nemendur mæta aftur í skólann skv. stundaskrá mánudaginn 6. janúar. Föstudaginn 3. janúar er skipulagsdagur kennara.

Ágætu nemendur, foreldrar og aðrir velunnarar skólans!

Um leið og við óskum ykkur og fjölskyldum ykkar gleðilegrar jólahátíðar þökkum við ánægjulegar samverustundir á árinu sem er að líða.

Megi nýja árið færa ykkur gleði og frið.

Jólakveðja,

starfsfólk Oddeyrarskóla

Í síðustu vikunni fyrir jól er mikið um að vera. Þriðjudaginn 17. desember ætlum við öll að skera laufabrauð og steikja. Nemendur geta síðan geymt sitt laufarbauð til næsta dags því þá er jólamatur í mötuneyti skólans. Á fimmtudaginn, 19. desember bjóða nemendur í 9. bekk og foreldrafélagið okkur öllum á jólalegt kaffihús þar sem boðið verður upp á heitt kakó og piparkökur. Föstudaginn 20. desember eru litlu-jól og þá hittast bekkir stutta stund í kennslustofum og svo förum við í salinn að dansa í kringum jólatréð. Það er því full ástæða til að hlakka til næstu daga 🙂

Í dag fóru 3. og 4. bekkur á skíði í boði Skíðafélags Akureyrar og Skíðastaða. Krakkarnir fengu lánaðan búnað og gátu fengið kennslu á svigskíði, bretti og gönguskíði eftir því hvað þau völdu sér og gekk það allt saman mjög vel. Börnin fengu einnig 4 daga passa í fjallið sem þau geta notað þegar þeim hentar og geta því æft sig enn betur á skíði.

Veðrið og stemmningin var eins og best verður á kosið eins og myndirnar bera með sér og nutu allir sín mjög vel og komu alsælir til baka. Sú hugmynd kom fram meðal nemenda að hafa bara alla fimmtudaga svona skíðadaga þetta væri svo rosalega gaman 🙂

Haldin var myndasamkeppni hér í Oddeyrarskóla í nóvember og var þemað „jólakötturinn“. Margir skiluðu mjög flottum myndum. Skilyrðin voru að vanda vinnubrögð og gera ramma utan um myndirnar.

Dómnefnd valdi 7 myndir sem sigruðu keppnina og verða þær myndir notaðar á jólakort sem skólinn sendir frá sér nú í desember. Þeir hæfileikaríku nemendur sem áttu sigurmyndirnar eru Lára Huld Jónsdóttir í 5. bekk (tvær myndir), Vala Alvilde Berg 5. bekk, Teresa Regína Snorradóttir 7. bekk, Freyja Jóhannsdóttir 6. bekk, Róbert Aron Mikaelsson 7. bekk og Ellen Ósk Hólmarsdóttir 5. bekk.

Sigurvegarar hæfileikakeppninnar í ár

Nemendaráð Oddeyrarskóla stóð fyrir hæfileikakeppni fyrir alla nemendur skólans síðastliðinn föstudag, 6. desember.

Margir tóku þátt og komu keppendur frá 1. – 10. bekk. Atriðin voru eins og gefur að skilja af ýmsum toga, t.d. fengum við að njóta söngs, fimleika, brandara, tónlistarflutnings, töfrabragða og fleiri skemmtilegra atriða.

Sigurvegarar keppninnar að þessu sinni voru Örn Sigurvinsson í 2. bekk sem sýndi töfrabrögð og Ólöf Inga Birgisdóttir 10. bekk sem var með uppistand. Við óskum þeim innilega til hamingju með flotta frammistöðu!

Við áttum frábæra samverustund í sal skólans og þökkum nemendaráðinu og öllum keppendum og áhorfendum fyrir sitt framlag.

Vonandi er þessi hæfileikakeppni komin til að vera því nemendur Oddeyrarskóla hafa svo sannarlega ýmislegt fram að færa. Myndir frá hæfileikakeppninni eru komnar á myndasíðu skólans.

Smellið á myndina til að sjá hana stærri

Síðastliðin föstudag lauk ég mikilvægum áfanga í kennaranáminu, æfingakennslunni. Það hefur verið einstaklega ljúft og lærdómsríkt að vera nemi hér í Oddeyrarskóla og það er með söknuði sem ég kveð ykkur öll og sérstaklega þennan flotta hóp nemenda í 7. bekk.

Bestu kveðjur Særún

Nú er Tengja desembermánaðar komin í loftið, hún er hér. Eldri fréttabréf má finna undir tenglingum TENGJA hér fyrir ofan.