Kæru velunnarar Oddeyrarskóla
Unglingadeildin er þessa dagana að hanna kassabíla fyrir Frístund og vantar sárlega dekk undir bílana. Dekk af öllum gerðum eru vel þegin. Hægt er að koma með þau í skólann en einnig er hægt að hafa samband við skólann og þau verða sótt.
Með von um góð viðbrögð
Unglingadeildin
Um þessar mundir berst foreldrum allra grunnskólabarna á Akureyri bréf frá Soffíu Vagnsdóttur, fræðslustjóra Akueyrarbæjar þar sem hún vekur athygli foreldra á læsisátaki okkar og mikilvægi þess að við hjálpumst öll að við lestrarnám barnanna. Hún biðlar til foreldra um að vera með í lestrarátaki skólanna á Akureyri. Bréfið endar á eftirfarandi orðum:
„Með þessu bréfi biðla ég til ykkar allra um að vera með í lestrarátaki skólanna á Akureyri. Við ætlum okkur að ná frábærum árangri með börnin okkar. Við viljum festa í sessi þá hugsun að það er á ábyrgð okkar allra að börnin okkar verði læs. Að þau séu hvött, studd og hafi góðar fyrirmyndir. Þetta er grundvallaratriði. Í Reykjanesbæ náðist á örfáum árum frábær árangur í samræmdum prófum með sameiginlegu átaki í læsi. Þar var lyft grettistaki þar sem allir hjálpuðust að og öxluðu ábyrgð. Þetta viljum við gera á Akureyri. Við ætlum að ná árangri. Við þurfum ykkur kæru foreldrar með í liðið.“
Við hvetjum alla foreldra/forráðamenn barna í Oddeyrarskóla til að kynna sér innihald þessa bréfs.
Nú fer vetrarstarfið að hefjast hjá okkur hjá félagsmiðstöðvunum á Akureyri. Það hafa orðið breytingar hjá okkur sem tengjast Oddeyrarskóla, en í stað þess að vera undir félagsmiðstöðinni Tróju ætlum við að taka aftur upp á því a
ð vera með sér rekna félagsmiðstöð. Það felur í sér að við munum stofna nýja félagsmiðstöð fyrir okkur á eyrinni og verðum því í takt við þorpið þar sem sér félagsmiðstöð er við hvern skóla.
Hér má sjá bréf til foreldra vegna nýrrar félagsmiðstöðvar hér í Oddeyrarskóla og hér fyrir neðan má sjá dagskrá septembermánaðar.
Ákveðið var rétt í þessu að 1. bekkur færi í gönguferð innanbæjar í stað þess að fara í Krossanesborgir. Krakkarnir verða úti allan morguninn og þurfa góðan fatnað og nesti fyrir ferðina.
Hausthátíð Foreldrafélags Oddeyrarskóla verður haldin laugardaginn 12. september. Nánari upplýsingar verða birtar síðar.
Á morgun, þriðjudaginn 1. september er fyrirhugaður útivistardagur. Veðurspáin er góð svo okkur er því ekkert ábótavant.
Skipulagið er á þessa leið:
Nemendur í 1. – 4. bekk fara allir í Krossanesborgir með umsjónarkennurum sínum og öðru starfsfólki. Nemendur eru komnir í skólann um kl. 12, fara þá í mat og reikna má með að þau séu komin heim um kl. 12:30. Þau börn sem eru í Frístund fara beint þangað að mat loknum.
Nemendur í 5. – 10. bekk völdu á milli þess að ganga upp að Hraunsvatni, ganga í Kjarnaskóg eða að fara í hjólaferð.
Nemendur í 5. – 10. bekk koma heim á ólíkum tímum, en reikna má með að allir séu búnir um eða upp úr kl. 13.
Við minnum á að þeir sem hjóla verða að vera með hjálm á höfði og svo er mikilvægt að klæða sig eftir veðri og hafa með sér gott nesti.
Stundvísi er dyggð sem mikilvægt er að allir tileinki sér. Langflestir nemendur Oddeyrarskóla mæta á réttum tíma í allar kennslustundir en þeir eru til sem ekki passa upp á það. Það getur valdið óþægindum bæði fyrir viðkomandi nemendur og bekkjarfélaga hans. Í haust leggjum við upp með skýrar reglur varðandi mætingar og viðbrögð ef eitthvað bregður út af. Reglurnar má finna á heimasíðunni undir flipanum starfshættir. Mikilvægt er að heimili og skóli taki höndum saman við að venja nemendur á að mæta stundvíslega til verka.
Nemendur 6. bekkjar Oddeyrarskóla fóru í siglingu með Húna II miðvikudaginn 26. ágúst. Ferðin byrjaði á því að Steini Pjé fór yfir öll öryggisatriði skipsins og kenndi krökkunum hvað gera skildi ef eitthvað kæmi uppá í ferðinni. Svo fengu nemendurnir fræðslu um sjávardýr hjá Hreiðari Þór Valtýssyni líffræðingi og skoðuðu ýmis sýnishorn af skemmtilegum lífverum úr sjó sem búið var að þurrka. Þegar við vorum komin út á Hörgárgrunn sást hvalablástur við austurströndina og við hröðuðum okkur þangað, þar voru nokkrir Hnúfubakar á ferð og fengum við stórkostlega sýningu hjá þeim. Að því loknu var rennt fyrir fisk og fiskurinn krufinn og innyflin skoðuð. Veiði var ágæt og margir sýndu mikla veiðitakta. Á heimleiðinni var fiskurinn grillaður og þeir sem vildu gátu smakkað. Við vorum heppin með veður, það var þurrt og lítill vindur en þegar við vorum á leiðinni í land byrjaði að rigna og hvessa. Þetta var frábær ferð, nemendur 6. bekkjar stóðu sig vel og voru til fyrirmyndar.
Við þökkum áhöfninni á Húna, skóladeildinni og Háskólanum á Akureyri fyrir fróðlega og skemmtilega ferð!
Fleiri myndir úr ferðinni má sjá á myndasíðu skólans.
Oddeyrarskóli er einn af fyrstu skólunum til að taka upp Byrjendalæsi sem kennsluaðferð í lestrarkennslu yngstu barnanna. Hér var unnið mikið frumkvöðlastarf fyrstu árin í innleiðingu aðferðarinnar. Kennarar höfðu ekki námsefni til að styðjast við og unnu hörðum höndum að því að skapa góða umgjörð um læsiskennslu í 1. og 2. bekk með dyggum stuðningi starfsmanna Háskólans á Akureyri.
Kennarar skólans eru sammála um að aðferðin hafi marga kosti umfram það sem áður var notað, hún bjóði upp á stöðuga þróun og hafni jafnframt engum öðrum góðum lausnum í læsisnámi barna. Mikið er lagt upp úr því að allir þættir læsis fái athygli; þ.e. umskráning, lestur, ritun og talað mál. Verkefnin innan þessara þátta eru fjölbreytt og fær sköpunarkraftur nemenda og kennara að njóta sín við val á þeim. Mikil áhersla er lögð á að nálgast þarfir nemenda út frá reglulegu mati á stöðu þeirra svo þeir fái verkefni við hæfi. Mikil vinna hefur verið lögð í að finna og útbúa verkefni og leiðir til að bregðast við á markvissan hátt þegar árangri er ábótavant í þeim skimunarprófum sem lögð eru fyrir.
Árangur Oddeyrarskóla á samræmdum prófum er sveiflukenndur og má skýra það með ýmsum þáttum. Kennsluhættir eru ávallt skoðaðir þegar rýnt er í niðurstöður prófa og tökum við fagnandi hverjum þeim leiðum sem geta fleytt okkur áfram í átt að betri árangri með nemendum okkar. Skólinn hefur nýtt PALS aðferðina í læsisvinnunni sem styður vel við það sem gert hefur verið í Byrjendalæsi. PALS er þó ekki heildstæð leið sem hægt er að nota allt skólaárið en góð viðbót sem hentar mörgum nemendum. Eins nýtum við skimunarprófið Leið til læsis til að skima eftir lestrarvanda og fylgja eftir framförum. Leið til læsis fellur einnig vel að hugmyndum Byrjendalæsis og styður vel við það. Við teljum Byrjendalæsi vel til þess fallið að hjálpa börnum að ná árangri í námi í 1. og 2. bekk en fjölmargir aðrir þættir skipta þar einnig máli.
Byrjendalæsi fellur einkar vel að hugmyndum sem birtast í Aðalnámskrá grunnskóla frá 2011, bæði hvað varðar markmið í íslensku og áherslum á að efla lykilhæfni nemenda.
Við upphaf innleiðingar á byrjendalæsi var búið til myndband til að kynna þessa nálgun í lestrarnámi og hvetjum við aðila skólasamfélagsins til að skoða það hér.
Meðfylgjandi myndir eru frá heimsókn Illuga Gunnarssonar menntamálaráðherra þegar hann kom á degi íslenskrar tungu 16. nóvember 2013 til að kynna sér hugmyndafræði byrjendalæsis.
Nú eru nemendur 7. bekkjar í skólabúðum að Reykjum í Hrútafirði. Við sækjumst gjarnan eftir því að fara snemma að hausti til að nota tækifærið til að þétta nemendahópinn í upphafi skólaárs og um leið eiga meiri möguleika á að vera að Reykjum í góðu veðri.
Á mánudagsmorgunn fór frá Oddeyrarskóla 24 nemenda hópur og með þeim eru tveir starfsmenn og tveir kennaranemar. Við fengum góðar fréttir af þeim í gær og kennari segir að þarna séu á ferðinni sjálfstæð, dugleg og kurteis börn. Allir geri sitt besta í einu og öllu og vinátta, virðing, samkennd og sjálfstæði ráði ríkjum 🙂 Ekki amaleg ummæli það!
Við eigum von á þeim til baka næstkomandi föstudag um kl. 15, en foreldrar fá nánari upplýsingar í tölvupósti þegar nær dregur.
Þeir sem vilja kynna sér skólabúðirnar að Reykjum í Hrútafirði nánar geta skoðað heimasíðu skólans hér.
