Nauðsynlegt er að rýna í með reglulegum hætti í skólastarfið og meta hvað vel er gert og hvað megi bæta. Mikilvægt er að gefa nemendum tækifæri til að koma að matinu á lýðræðislegan hátt. Í þessari viku stendur því til að kalla nemendur á skólaþing þar sem þeir eru beðnir um að rýna í ákveðna þætti skólastarfsins. Nemendur á öllum stigum taka þátt í skólaþinginu, en misjafnt er hvernig þingið er framkvæmt á hverju stigi fyrir sig.

Þeir þættir sem eru til umfjöllunar eru m.a. bóklegt nám, smiðjur, hádegismaturinn, íþróttatímar, uppbrotsdagar, samskipti, hvernig stuðlað er að bættum námsárangri og hvernig stuðlað er að gleði í skólastarfinu. Kallað er eftir skoðun nemenda á því sem vel er gert, hvað megi mæta og hvernig.

Hér eru myndverk nemenda langt komin en endanlega útkomu má sjá í Ketilhúsinu.

Samsýningin Sköpun bernskunnar var opnuð í Ketilhúsinu síðasta laugardag. Þátttakendur eru nemendur í leik- og grunnskólum Akureyrar, tíu starfandi myndlistarmenn og Leikfangasýningin í Friðbjarnarhúsi. Þemað er börn og sköpun þeirra. Hugmyndin var að blanda saman list starfandi myndlistarmanna og verkum eftir börn og leikföngum þeirra. Stefnt er að því að sýningin verði árviss viðburður með nýjum þátttakendum ár hvert. 

Nemendur Oddeyrarskóla eiga tvö skemmtileg verk á sýningunni en þau verk voru samvinnuverkefni margra nemenda undir leiðsögn myndlistakennarans Gígju Þórarinsdóttur.

Tengja aprílmánaðar komin á heimasíðu skólans.

Hér má lesa Tengju aprílmánaðar. Eldri fréttabréf er að finna á heimasíðu skólans undir flipanum Tengja.

Nú er skóladagatalið okkar fyrir næsta skólaár tilbúið. Skóladagatalið hefur verið tekið til umræðu og samþykkt á kennarafundi, í skólaráði Oddeyrarskóla og skólanefnd Akureyrarbæjar.

Skóladagatal 2015-2016

Skólavarðan, málgagn Kennarasambands Íslands, kom út í dag. Í þessu blaði gefur m.a. að líta ítarlega umfjöllun um það þróunarstarf sem við í Oddeyrarskóla höfum unnið síðustu tvö ár en það snýst um að auka upplýsingatækni í námi nemenda í gegnum umhverfi sem kallast Google education.

Google education hefur leyst USB lykla af hólmi og gefið nemendum tækifæri til aukinnar rafrænnar samvinnu auk þess sem það auðveldar kennurum að leiðbeina nemendum á auðveldan hátt við ritunarvinnu.

Myndin hér til hægri sýnir þau hugtök sem komu upp í hugann þegar við horfðum til þess hvað þessi þróun hefur haft í för með sér.

Hér má fletta skólavörðunni og lesa greinina sem er eftir Karl Eskil Pálsson.

Einkunnarorð Oddeyrarskóla eru:

ÁBYRGÐ – VIRÐING – VINÁTTA

Í Oddeyrarskóla vinnum við saman að því að skapa skólasamfélag sem nær árangri. Það einkennist af jákvæðum skólabrag, áhugasömum og metnaðarfullum einstaklingum.

Jákvæður skólabragur byggist á virðingu fyrir öllum einstaklingum og umhverfi þar sem margbreytileika skólasamfélagsins er fagnað. Hver og einn er meðvitaður um gildi sitt í samfélaginu og axlar ábyrgð á hlutverki sínu. Við sköpum áhuga meðal einstaklinga með því að gera námið forvitnilegt og fjölbreytt og náms- og starfsumhverfi vinsamlegt og hvetjandi. Hver og einn sýnir ábyrgð í því að leita leiða til að skapa þessar aðstæður. Við byggjum upp metnað með því að skapa aðstæður þar sem einstaklingum er gefinn kostur á að nýta styrkleika sína og hæfileika til að ná árangri. Mat á starfinu skal sett fram með leiðbeinandi og uppbyggjandi hætti. Þannig skapast vilji til að þróa og efla starfið.

Nú er kominn sá árstími að börn og fullorðnir fara að draga fram reiðhjólin sín. Af því tilefni minnum við á hjólareglurnar okkar.

Reglur um hjólanotkun í Oddeyrarskóla.

1. Nemendur mega koma á hjóli í skólann frá og með vorönn í 2. bekk.
2. Nemandi sem kemur á hjóli í skólann gerir það á ábyrgð foreldra/forráðamanna sem skulu meta færni og getu nemandans sem og aðstæður til að hjóla í skólann.
3. Algjört skilyrði er að nota viðeigandi öryggisbúnað.
4. Ekki má nota reiðhjól í frímínútum eða meðan á skólastarfi og Frístundargæslu stendur. Við brot á þessari reglu má skólinn kyrrsetja hjól og skal foreldri eða forráðamaður þá sækja hjólið.
5. Þegar komið er á hjóli í skólann á að geyma hjól læst á skólalóðinni í eða við hjólagrindur. Skólinn ber enga ábyrgð á hjólum. Þjófnað eða skemmdarverk getur viðkomandi kært til lögreglu.

Við vekjum athygli nemenda og foreldra á fjármálafræðslu með Jóni Jónssyni sem er í boði fyrir ungt fólk á aldrinum 12 – 16 ára.  Fræðslan byggir á efni bókarinnar Ferð til fjár eftir Breka Karlsson, forstöðumann Stofnunar um fjármálalæsi. Á fundunum fer Jón yfir það hvernig peningar virka, mikilvægi þess að setja sér markmið og hvernig hægt er að láta peningana endast aðeins lengur. Fræðslufundurinn verður í Menningarhúsinu Hofi miðvikudaginn 8. apríl kl. 20:00. Húsið opnar kl. 19:30.

Heil og sæl kæru foreldrar og nemendur!

Nú er komin ný Tengja, fréttablað okkar í Oddeyrarskóla. Þar gefur að líta upplýsingar um ýmislegt sem unnið hefur verið í skólanum og annað sem er framundan.

Við óskum ykkur öllum gleðilegra páska! Skólastarfið hefst á ný þriðjudaginn 7. apríl.

Bestu kveðjur, stjórnendur.

Á morgun er síðasti kennsludagur fyrir páskafrí. Hefð er fyrir því að fara á skauta og spila bingó þennan dag. Á bingóinu verða eins og venja er páskaegg í verðlaun. Að vanda er bingóið helgað styrktarbarni okkar, Clyceru Manga sem búsett er í SOS barnaþorpi í Guine Bissau. Nemendur eru að vanda hvattir til að koma með smá peninga til styrktar henni. Til viðmiðunar eru 300-400 krónur ágætt framlag. Þennan dag má koma með sætabrauð og safa í nesti.

Við minnum á að allir eiga að vera með hjálm á skautasvellinu. Mjög gott væri ef krakkarnir gætu komið með hjólahjálmana sína en hægt er að fá lánaða hjálma þar.

Skóli hefst að nýju þriðjudaginn 7. apríl samkvæmt stundaskrá.

Með kveðju og óskum um gott páskafrí,

Kristín, Fjóla og Rannveig,
stjórnendur Oddeyrarskóla