Miðvikudaginn 8. febrúar er opið hús fyrir foreldra nemenda sem hefja skólagöngu í 1. bekk næsta haust frá klukkan 13:00 – 14:00. Vinsamlegast notið starfsmannainngang að norðan en kynning fer fram í stofu 106.

Þessa vikuna standa yfir æfngar vegna árshátíðar skólans sem fram fer í vikulokin. Föstudagurinn 27. janúar er tvöfaldur skóladagur en eftir hádegishlé sýna allir árgangar sín atriði fyrir samnemendur og starfsfólk skólans. Á laugardaginn eru síðan leiksýningar fyrir foreldra og forrðáðamenn og aðra nákomna. Frekari upplýsingar um árshátíðana má finna hér í þessu foreldrabréfi. Vert er að minna á glæsilegt kaffihlaðborð foreldrafélagsins á laugardaginn sem verður í boði milli leiksýninga en sýningar verða sem hér segir:

Fyrsta sýning kl. 11:30 1., 5., 9. og 10. bekkur

Önnur sýning kl. 13:00 2., 4., 7. og 10. bekkur

Þriðja sýning kl. 14:30 3., 6., 8. og 10. bekkur

Við hjá FÉLAK erum með ýmislegt á prjónunum 

Markmiðið hjá okkur er alltaf að búa til, eða að finna, fjölbreytta og skemmtilega afþreyingu fyrir börnin og við vitum vel að snjalltæki heilla mikið á þessum tímum. Vegna þessa þá ætlum við að reyna að færa þeim verkefni og þrautir sem að vonandi færa þessa skjánotkun á jákvæðari og uppbyggilegri brautir. 

Opin hús og klúbbastarf fara að byrja, ýmsir stórir viðburðir eru einnig á dagskrá þessa önnina, frekari upplýsingar um það verður að sjálfsögðu auglýst, bæði á facebook síðunni okkar og í skólunum.

Umsjón með starfi FÉLAK eru Andri Már Mikaelsson og Hulda Ósk Jónsdóttir
Sérfræðingar í félagsmálum barna

Starfsfólk Oddeyrarskóla óskar nemendum, foreldrum og öðrum velunnurum skólans gleðilegar jólahátíðar og farsældar á komandi ár með þökk fyrir gott samstarf á árinu sem er að líða.

Ágætu foreldrar og forráðamenn.

Tekin hefur verið ákvörðun að um næstu áramót bjóðist eftirfarandi foreldrahópum afsláttur í frístund, einstæðum foreldrum, námsmönnum þar sem báðir foreldrar eru í fullu námi, öryrkjum þar sem báðir foreldrar eru 75% öryrkjar og atvinnulausum foreldrum. Jafnframt gildir afslátturinn þar sem annað foreldrið er t.d. í fullu námi og hitt atvinnulaust eða 75% öryrki.

Til að njóta afsláttar:

• Þurfa námsmenn að framvísa skólavottorðum í byrjun hverrar annar.
  •  Í vottorði frá skóla þarf að koma fram að um fullt nám sé að ræða og það varir í að minnsta kosti í eitt ár.
  •  Í lok annar þarf að skila staðfestingu um námsframvindu.  
• Þurf atvinnulausir foreldrar, að sækja um mánaðarlega og skila vottorði um stöðu sína frá Vinnumálastofnum fyrir 20. hvers mánaðar.
• Þurfa foreldar að vera skráðir 75% öryrkjar.
• Þurfa einstæðir foreldrar að skila inn vottorði frá sýslumanni um hjúskaparstöðu
  • Hægt er að sækja vottorð um hjúskaparstöðu rafrænt inn á þjóðskrá
    (umsókn C-116)

Sótt er um afslátt í Völu– frístund kerfinu. Eftirfarandi staðfestingar þurfa að berast í viðhengi með umsókn. Lægra gjald tekur gildi 1. dag næsta mánaðar eftir að umsókn og gögn berast.

• vottorðum frá skólum,
• vottorð frá Vinnumálastofnun   
• staðfesting um hjúskaparstöðu frá sýslumanni 
• mynd af örorkuskírteini.

Fræðslu-og lýðheilsusvið Akureyrarbæjar

Nemendur hafa verið að skreyta hurðir í skólanum. Hér má sjá afraksturinn en dómnefnd mun vald jólahurð ársins 2022. Sigurvegarar að þessu sinni voru nemendur í 1. bekk hjá þeim yngri og 9. bekk hjá eldri nemendum.

Fimmtudaginn 24. nóvember var bókasafnið opið síðdegis, frá 16:30 -18:00, fyrir nemendur, foreldra og aðra gesti sem áhuga höfðu á að kíkja í heimsókn.

Boðið var upp á kaffi, kleinur og kókómjólk. 

Á sama tíma var fatamarkaður, þar sem fólk gat komið og fengið sér föt og annað sem kom úr geymslum og skápum starfsmanna og foreldra, sem og skoðað þau föt sem skilin hafa verið eftir hér í skólanum undanfarið. 

Mæting var allgóð. Um 30 manns kíktu inn á bókasafnið. Sumir gerðu stuttan stans, öðrum dvaldist lengur við að skoða bækur með börnum sínum eða spila við þau.

Í tilefni baráttudags gegn einelti, 8. nóvember, fengu nemendur 1. bekkjar og nýir nemendur í 2. bekk, afhentar húfur sem á stendur „Gegn einelti“. Þetta er í sjöunda sinn sem við í Oddeyrarskóla gerum þetta en starfsmenn og velunnarar skólanns prjónuðu húfurnar. Húfurnar eru merktar hverju barni og hver þeirra er með sína liti og eru þær fjölbreytilegar í útliti eins og nemendahópurinn.

Foreldrafélag Oddeyrarskóla gaf skólanum á dögunum afar veglega gjöf sem á svo sannarlega eftir að nýtast nemendum vel.  Um er að ræða fjöldan allan af spilum fyrir bæði unga og aldna og færum við foreldrafélaginu okkar bestu þakkir fyrir þessa einstaklega flottu gjöf.