Frá árinu 1965 hafa Sameinuðu þjóðirnar helgað 8. september málefnum læsis. Íslendingar taka sem fyrr þátt í þessum alþjóðlega degi með ýmsum hætti.
Miðstöð skólaþróunar við HA, Bókasafn HA, Amtsbókasafnið, skóladeild Akureyrarbæjar og Barnabókasetur Íslands starfa saman að undirbúningi læsisviðburða á Akureyri og hvetja aðra til að gera slíkt hið sama í sínu umhverfi. Hér má sjá nánari upplýsingar um viðburði dagsins.
Um þessar mundir berst foreldrum allra grunnskólabarna á Akureyri bréf frá Soffíu Vagnsdóttur, fræðslustjóra Akueyrarbæjar þar sem hún vekur athygli foreldra á læsisátaki okkar og mikilvægi þess að við hjálpumst öll að við lestrarnám barnanna. Hún biðlar til foreldra um að vera með í lestrarátaki skólanna á Akureyri. Bréfið endar á eftirfarandi orðum:
„Með þessu bréfi biðla ég til ykkar allra um að vera með í lestrarátaki skólanna á Akureyri. Við ætlum okkur að ná frábærum árangri með börnin okkar. Við viljum festa í sessi þá hugsun að það er á ábyrgð okkar allra að börnin okkar verði læs. Að þau séu hvött, studd og hafi góðar fyrirmyndir. Þetta er grundvallaratriði. Í Reykjanesbæ náðist á örfáum árum frábær árangur í samræmdum prófum með sameiginlegu átaki í læsi. Þar var lyft grettistaki þar sem allir hjálpuðust að og öxluðu ábyrgð. Þetta viljum við gera á Akureyri. Við ætlum að ná árangri. Við þurfum ykkur kæru foreldrar með í liðið.“
Við hvetjum alla foreldra/forráðamenn barna í Oddeyrarskóla til að kynna sér innihald þessa bréfs.
Nú fer vetrarstarfið að hefjast hjá okkur hjá félagsmiðstöðvunum á Akureyri. Það hafa orðið breytingar hjá okkur sem tengjast Oddeyrarskóla, en í stað þess að vera undir félagsmiðstöðinni Tróju ætlum við að taka aftur upp á því a
ð vera með sér rekna félagsmiðstöð. Það felur í sér að við munum stofna nýja félagsmiðstöð fyrir okkur á eyrinni og verðum því í takt við þorpið þar sem sér félagsmiðstöð er við hvern skóla.
Hér má sjá bréf til foreldra vegna nýrrar félagsmiðstöðvar hér í Oddeyrarskóla og hér fyrir neðan má sjá dagskrá septembermánaðar.
Ákveðið var rétt í þessu að 1. bekkur færi í gönguferð innanbæjar í stað þess að fara í Krossanesborgir. Krakkarnir verða úti allan morguninn og þurfa góðan fatnað og nesti fyrir ferðina.
Á morgun, þriðjudaginn 1. september er fyrirhugaður útivistardagur. Veðurspáin er góð svo okkur er því ekkert ábótavant.
Skipulagið er á þessa leið:
Nemendur í 1. – 4. bekk fara allir í Krossanesborgir með umsjónarkennurum sínum og öðru starfsfólki. Nemendur eru komnir í skólann um kl. 12, fara þá í mat og reikna má með að þau séu komin heim um kl. 12:30. Þau börn sem eru í Frístund fara beint þangað að mat loknum.
Nemendur í 5. – 10. bekk völdu á milli þess að ganga upp að Hraunsvatni, ganga í Kjarnaskóg eða að fara í hjólaferð.
Nemendur í 5. – 10. bekk koma heim á ólíkum tímum, en reikna má með að allir séu búnir um eða upp úr kl. 13.
Við minnum á að þeir sem hjóla verða að vera með hjálm á höfði og svo er mikilvægt að klæða sig eftir veðri og hafa með sér gott nesti.
Stundvísi er dyggð sem mikilvægt er að allir tileinki sér. Langflestir nemendur Oddeyrarskóla mæta á réttum tíma í allar kennslustundir en þeir eru til sem ekki passa upp á það. Það getur valdið óþægindum bæði fyrir viðkomandi nemendur og bekkjarfélaga hans. Í haust leggjum við upp með skýrar reglur varðandi mætingar og viðbrögð ef eitthvað bregður út af. Reglurnar má finna á heimasíðunni undir flipanum starfshættir. Mikilvægt er að heimili og skóli taki höndum saman við að venja nemendur á að mæta stundvíslega til verka.
Oddeyrarskóli er einn af fyrstu skólunum til að taka upp Byrjendalæsi sem kennsluaðferð í lestrarkennslu yngstu barnanna. Hér var unnið mikið frumkvöðlastarf fyrstu árin í innleiðingu aðferðarinnar. Kennarar höfðu ekki námsefni til að styðjast við og unnu hörðum höndum að því að skapa góða umgjörð um læsiskennslu í 1. og 2. bekk með dyggum stuðningi starfsmanna Háskólans á Akureyri.
Kennarar skólans eru sammála um að aðferðin hafi marga kosti umfram það sem áður var notað, hún bjóði upp á stöðuga þróun og hafni jafnframt engum öðrum góðum lausnum í læsisnámi barna. Mikið er lagt upp úr því að allir þættir læsis fái athygli; þ.e. umskráning, lestur, ritun og talað mál. Verkefnin innan þessara þátta eru fjölbreytt og fær sköpunarkraftur nemenda og kennara að njóta sín við val á þeim. Mikil áhersla er lögð á að nálgast þarfir nemenda út frá reglulegu mati á stöðu þeirra svo þeir fái verkefni við hæfi. Mikil vinna hefur verið lögð í að finna og útbúa verkefni og leiðir til að bregðast við á markvissan hátt þegar árangri er ábótavant í þeim skimunarprófum sem lögð eru fyrir.
Árangur Oddeyrarskóla á samræmdum prófum er sveiflukenndur og má skýra það með ýmsum þáttum. Kennsluhættir eru ávallt skoðaðir þegar rýnt er í niðurstöður prófa og tökum við fagnandi hverjum þeim leiðum sem geta fleytt okkur áfram í átt að betri árangri með nemendum okkar. Skólinn hefur nýtt PALS aðferðina í læsisvinnunni sem styður vel við það sem gert hefur verið í Byrjendalæsi. PALS er þó ekki heildstæð leið sem hægt er að nota allt skólaárið en góð viðbót sem hentar mörgum nemendum. Eins nýtum við skimunarprófið Leið til læsis til að skima eftir lestrarvanda og fylgja eftir framförum. Leið til læsis fellur einnig vel að hugmyndum Byrjendalæsis og styður vel við það. Við teljum Byrjendalæsi vel til þess fallið að hjálpa börnum að ná árangri í námi í 1. og 2. bekk en fjölmargir aðrir þættir skipta þar einnig máli.
Byrjendalæsi fellur einkar vel að hugmyndum sem birtast í Aðalnámskrá grunnskóla frá 2011, bæði hvað varðar markmið í íslensku og áherslum á að efla lykilhæfni nemenda.
Við upphaf innleiðingar á byrjendalæsi var búið til myndband til að kynna þessa nálgun í lestrarnámi og hvetjum við aðila skólasamfélagsins til að skoða það hér.
Meðfylgjandi myndir eru frá heimsókn Illuga Gunnarssonar menntamálaráðherra þegar hann kom á degi íslenskrar tungu 16. nóvember 2013 til að kynna sér hugmyndafræði byrjendalæsis.
Nú eru nemendur 7. bekkjar í skólabúðum að Reykjum í Hrútafirði. Við sækjumst gjarnan eftir því að fara snemma að hausti til að nota tækifærið til að þétta nemendahópinn í upphafi skólaárs og um leið eiga meiri möguleika á að vera að Reykjum í góðu veðri.
Á mánudagsmorgunn fór frá Oddeyrarskóla 24 nemenda hópur og með þeim eru tveir starfsmenn og tveir kennaranemar. Við fengum góðar fréttir af þeim í gær og kennari segir að þarna séu á ferðinni sjálfstæð, dugleg og kurteis börn. Allir geri sitt besta í einu og öllu og vinátta, virðing, samkennd og sjálfstæði ráði ríkjum 🙂 Ekki amaleg ummæli það!
Við eigum von á þeim til baka næstkomandi föstudag um kl. 15, en foreldrar fá nánari upplýsingar í tölvupósti þegar nær dregur.
Þeir sem vilja kynna sér skólabúðirnar að Reykjum í Hrútafirði nánar geta skoðað heimasíðu skólans hér.
Hér eru örfáir punktar frá íþróttakennara um veturinn framundan:
Íþróttakennsla úti og inni
Íþróttakennslan verður utandyra fyrstu 4-5 vikurnar, vonandi til 23.september en það fer allt eftir veðri. Nemendur þurfa að koma klæddir eftir veðri og ekki síst í góðum útiskóm. Mæting í útitímana er á sparkvellinum við skólann. Nemendur geta nýtt búningsklefa og sturtur.
Í íþróttatímum sem eru inni eiga nemendur að nemendur vera í stuttum eða síðumí þróttabuxum og íþróttabol. Nemendur 1.- 4. bekkjar eiga að vera berfættir í íþróttum en í 5.-10. bekk er æskilegt að nemendur séu í skóm. Ætlast er til að nemendur fari í sturtu eftir tíma. Nauðsynlegt er að merkja vandlega allan íþróttafatnað, þar sem reynslan sýnir að ótrúlega mikið af óskilafötum safnast upp hjá okkur.
Sundkennsla
Nemendur eiga að vera mættir í Sundlaug Akureyrar 5 mínútum áður en kennslustund hefst. Nemendum verður ekið að og frá sundlaug og mun skólabíllinn leggja af stað frá Oddeyrarskóla 15 mínútum áður en tími hefst.
Nemendur skulu vera í sundfötum við hæfi í sundtímum. Strandbuxur og efnislítil bikini eru ekki hentug sundföt.
Forföll í íþróttum og sundi þarf að tilkynna til ritara skólans.
Foreldrar eru alltaf velkomnir í íþrótta- og sundtíma eins og aðrar kennslustundir og ég bið ykkur endilega um að hafa samband við mig ef þið teljið þörf á.
Skólasetning verður í Oddeyrarskóla föstudaginn 21. ágúst 2015.
Nemendur 1. – 4. bekkjar mæta á sal skólans kl. 9:00 og nemendur 5.-10. bekkjar mæta kl. 10.00. Skólastjóri setur skólann á sal og síðan fara nemendur með umsjónarkennurum sínum í kennslustofurnar.
Skólastarfið hefst síðan samkvæmt stundaskrá mánudaginn 24. ágúst 2015.
